दक्षिण कोरियाको छाङवोन शहरमा यही अक्टोबर २५ गते २१ औं बहुसांस्कृतिक कार्यक्रम भव्य रूपमा आयोजना हुने भएको छ ।
ख्यानाम इजुमिन सेन्टर छाङवद्वारा आयोजित यस कार्यक्रममा १६ देशका प्रतिनिधिहरूले आ–आफ्नो देशको मौलिक संस्कृति, भेषभूषा र कलाको झल्को दिनेछन् ।
नेपालतर्फबाट यसपटक विशेष रूपमा मगर समुदायको कौरा तथा सालैजो, सगरमाथा समाजको पञ्चेबाजा, सुदूरपश्चिम समाजको देउडा, थारु समुदायको सामूहिक नृत्य प्रस्तुती मार्फत नेपालको सांस्कृतिक सम्पदा अन्तर्राष्ट्रियरुपमा प्रदर्शन गरिने तयारी भइरहेको छ ।
कार्यक्रममा विशेष अतिथि कलाकारका रूपमा नेपालकी चर्चित गायिका बबीना किरातीको विशेष प्रस्तुति रहनेछ । उनले सांगीतिक प्रस्तुतीमार्फत नेपाललाई अन्तर्राष्ट्रिय मञ्चमा चिनाउनेछिन् ।
आयोजक संस्था ‘ख्यानाम इजुमिन सेन्टर छाङवन’ सँग सहकार्य गर्दै ख्यानाम नेपाली समाजले प्रत्यक वर्ष नेपाल चिनाउने लगायतका कार्यक्रमहरु आयोजन गर्दै आइरहेको छ ।
कोरियामा रहेका सम्पूर्ण नेपाली संघ–संस्था र समुदायको सहयोगले यो कार्यक्रमलाई अझ प्रभावशाली बनाउने लक्ष्य रहेको ख्यानाम नेपाली समाजका अध्यक्ष रवी खवासले बताए । त्यस्तै कार्यक्रममा नेपाली संस्कृति, पहिचान र गौरवलाई प्रवर्द्धन गर्न विविध प्रस्तुतीहरू समावेश गरिने उनको भनाइ छ ।
