पोखरा वडा नं. ५, पर्स्याङका ४५ वर्षीय अनिल पराजुलीको शनिबार बिहान हत्या भएको छ ।
हत्या आरोपमा स्थानीय २२ वर्षीय किशोर तिमिल्सिना पक्राउ परेको कास्की प्रहरीले जानकारी दिएको छ ।
पर्स्याङको चिल्ड्रेन पार्क नजिकै राति सँगै मापसे गरेका उनीहरुबीच विवाद भएपछि चक्कू प्रहार गरी किशोरले अनिलको हत्या गरेको कास्की प्रहरी प्रवक्ता डीएसपी हरिबहादुर बस्नेतले गण्डकीन्यूजलाई जानकारी दिए ।
उनका अनुसार बिहान ३ बजेर ५ मिनेटमा भएको घटनामा पराजुली अचेत अवस्थामा भेटिएको बारे प्रहरीलाई खबर पुगेको थियो । त्यहाँ पुग्दा बायाँ पिठ्यूँमा चोट लागेको अवस्थामा उनी भेटिएका थिए । तत्काल अस्पताल लगिएकोमा ३ः४० बजे चिकित्सकले मृत घोषणा गरेको डीएसपी बस्नेतले जानकारी दिए ।
‘उनीहरुबीच सामान्य विवाद भएको बुझिन्छ । स्थानीय क्षेत्रका उनीहरुबीच यो दोस्रो भेट रहेछ । पहिलो भेटमा पनि सामान्य विवाद भएको थाहा हुन आएको छ ।’ उनले भने – ‘सँगै खाईपिई बसेछन् । बाहिर निस्केर चक्कु प्रहार गरेको रहेछ ।’
किशोरले प्रहरीलाई बयान दिए अनुसार विवाद बढ्दै जाँदा जग्गा कारोबारी समेत रहेका अनिलले आफूलाई दुई थप्पड हानेका थिए। रिसले रन्थनिएका किशोरले होटलकै चक्कु लिएर होटलबाट केही टाढा पुगेपछि अनिलको बायाँ पिँठ्यू पछाडिपट्टि प्रहार गरे। मुटु र फोक्सोमा गम्भीर चोट पुगेकाले उनी त्यहीँ ढले ।
त्यसपछि किशोर इनड्राइभ एपमार्फत् मोटरसाइकल बोलाएर लेकसाइड पुगेर लुकेको खुलेको छ । प्रहरीले किशोरको आफन्तको मोबाइलबाट सम्पर्क गरी बोलाएपछि राति ४ बजेतिर घर नजिकैबाट पक्राउ गर्न सफल भएको प्रवक्ता बस्नेतले जानकारी दिए।
विवादका कारणबारे अनुसन्धान भइरहेको उनले बताए । पराजुलीको शव पोस्टमार्टमका लागि पोखरा स्वास्थ्य विज्ञान प्रतिष्ठान लगिएको छ ।
