नेपाली कांग्रेसको १५औँ महाधिवेशनअन्तर्गत स्याङ्जाका ११ वटै स्थानीय तहमा पालिका अधिवेशन सम्पन्न भएको छ । पाँच पालिकामा नेतृत्व सर्वसम्मत चयन भएको छ भने छ पालिकामा निर्वाचनमार्फत नेतृत्व चुनिएको छ ।
नेपाली कांग्रेस स्याङ्जाका जिल्ला उपसभापति केदार काफ्लेका अनुसार गल्याङ नगरपालिका, बिरुवा गाउँपालिका, हरिनास गाउँपालिका, फेदीखोला गाउँपालिका र आँधीखोला गाउँपालिकामा पालिका समिति निर्विरोध चयन भएको हो ।
वालिङ, चापाकोट, पुतलीबजार र भीरकोट नगरपालिका तथा अर्जुनचौपारी र कालीगण्डकी गाउँपालिकामा भने निर्वाचनबाट नेतृत्व चयन गरिएको छ ।
११ पालिकामा को-को बने सभापति ?
सर्वसम्मत चयन भएका पालिकामध्ये आँधीखोला गाउँपालिकाको सभापतिमा अनिल ढकाल, बिरुवा गाउँपालिकामा लालबहादुर हमाल, हरिनास गाउँपालिकामा बालकृष्ण सिग्देल, फेदीखोला गाउँपालिकामा महेन्द्र थापा र गल्याङ नगरपालिकामा श्यामप्रसाद बस्याल निर्वाचित भएका छन् ।
अर्जुनचौपारी गाउँपालिकाको सभापतिमा हरिप्रसाद काफ्ले निर्वाचित भएका छन् । उनले ९९ मत प्राप्त गर्दा उनका प्रतिस्पर्धी शालिग्राम काफ्लेले ५६ मत पाए । कुल १६२ प्रतिनिधिमध्ये १५८ मत खसेको थियो ।
पुतलीबजार नगरपालिकाको सभापतिमा सुरजकुमार अधिकारी निर्वाचित भएका छन् । अधिकारीले २५९ मत प्राप्त गर्दा प्रतिस्पर्धी लेखनाथ शर्माले १९१ मत पाए । नगर सचिवमा ख्यामकान्त अर्याल निर्वाचित भएका छन् । उनले २४५ मत प्राप्त गर्दा रामप्रसाद लम्सालले १९१ मत पाए ।
त्यस्तै, सहसचिवमा पूर्णबहादुर गुरुङ दोर्जे निर्वाचित भएका छन् । उनले २९७ मत प्राप्त गर्दा प्रतिस्पर्धी गौतमसिंह ठकुरीले १४४ मत पाए । पुतलीबजारमा कुल ४९६ प्रतिनिधिमध्ये ४५७ मत खसेको थियो ।
वालिङ नगरपालिकाको सभापतिमा पदमराज गुरुङ निर्वाचित भएका छन् । उनले २६९ मत प्राप्त गर्दा प्रतिस्पर्धी बोधराज कुँवर ‘राजु’ ले २६६ मत पाए । गुरुङ तीन मतको झिनो अन्तरले नगर सभापतिमा निर्वाचित भएका हुन् ।
यसैगरी, उपसभापतिमा यज्ञप्रसाद अधिकारी र महिला उपसभापतिमा जुनु थापा निर्वाचित भएका छन् । अधिकारीले २७७ मत प्राप्त गर्दा महिला उपसभापतिमा जुनु थापाले सर्वाधिक ३१५ मत प्राप्त गरिन् । उनका प्रतिस्पर्धी जगदिश पाठकले २३० र सीता ढुङ्गाना अधिकारीले २१४ मत प्राए ।
त्यस्तै, सचिव पदमा हुमनाथ अर्याल (वचन) निर्वाचित भएका छन् । उनले २५४ मत प्राप्त गर्दा प्रतिस्पर्धी बुद्धिसागर गैह्रेले २५३ मत पाए ।
सहसचिव पदमा एकनारायण कोइराला (उत्तम) निर्वाचित भएका छन् । कोइरालाले २५७ मत प्राप्त गर्दा प्रतिस्पर्धी विष्णुबहादुर खवासले २३४ मत पाए । कुल ५५९ प्रतिनिधिमध्ये ५४२ मत खसेको थियो ।
चापाकोट नगरपालिकाको सभापतिमा विक्रम सारु निर्वाचित भएका छन् । सारुले २४२ मत प्राप्त गर्दा प्रतिस्पर्धी विश्वास पुरीले ९८ र रामबहादुर श्रेष्ठले ५८ मत पाए ।
चापाकोटको सचिवमा विश्वप्रकाश भट्टराई निर्वाचित भएका छन् । उनले २२३ मत प्राप्त गर्दा दयाराम भण्डारीले ९१ र हरि डोटेलले ७१ मत प्राप्त गरे । चापाकोटमा कुल ४२० प्रतिनिधिमध्ये ४०४ मत खसेको थियो ।
भीरकोट नगरपालिकाको सभापतिमा नन्दलाल खनाल निर्वाचित भएका छन् । खनालले १९४ मत प्राप्त गर्दा उनका प्रतिस्पर्धी ताराप्रसाद अर्यालले १६७ मत पाए । खनाल २७ मतको अन्तरले नगर सभापतिमा निर्वाचित भएका हुन् । कुल ३८७ प्रतिनिधिमध्ये ३८५ मत खसेको थियो ।
कालीगण्डकी गाउँपालिकाको सभापतिमा नारायण भट्टराई निर्वाचित भएका छन् । सभापति पदका लागि भएको निर्वाचनमा भट्टराईले ११७ मत प्राप्त गर्दा उनका प्रतिस्पर्धी चक्रपाणि पाण्डेले १०१ मत पाए । कुल २४३ मतदातामध्ये २२५ मत खसेको थियो ।
पालिका अधिवेशन सम्पन्न भएसँगै कांग्रेसले स्थानीय तहमा नयाँ नेतृत्व चयन गरेको छ । यससँगै महाधिवेशन प्रतिनिधि छनोटको प्रक्रिया अघि बढेको छ । नेपाली कांग्रेसको १५औँ महाधिवेशनअन्तर्गत असोज १० गते क्षेत्रीय अधिवेशन हुने कार्यक्रम छ ।
