स्याङ्जाको वालिङ नगरपालिका वडा नं. ८ भीआईपी टोलबाट चोरी भएको मोटरसाइकलसहित दुई जना किशोर पक्राउ परेका छन् ।
गत बिहीबार साँझ वालिङ् -९ सुर्कौदीस्थित दरबारचोकबाट चोरी भएको मोटरसाइकलसहित फरार रहेका वालिङ् नगरपालिका -२ का दुई किशोरलाई पक्राउ गरिएको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक प्रसन्न राज चौधरीले जानकारी दिए । पक्राउ परेका किशोरहरुको उमेर करिब १६ वर्ष रहेको जनाइएको छ ।
लु ४२ प १९७१ नम्बरको बजाज कम्पनीको १५० सिसिको रातो–कालो रंगको पल्सर मोटरसाइकल चोरीको आरोपमा पक्राउ परेका किशोरहरुलाई शुक्रबार जिल्ला अदालत स्याङ्जामा पेश गरिएको डिएसपी चौधरीले बताए ।
अहिले अनुसन्धानका लागि पाँच दिन थप म्याद लिइएको जानकारी दिंदै चौधरीले अनुसन्धान कार्य जारी रहेको बताएका छन् ।














