दसैं, तिहार र छठ पर्वलाई लक्षित गर्दै जिल्ला प्रहरी कार्यालय स्याङ्जाले विशेष सुरक्षा योजना लागू गरेको छ ।
चाडपर्वमा हुन सक्ने चोरी, लुटपाट, जुवातास, कालोबजारी, ठगी तथा सवारी दुर्घटना नियन्त्रण गर्न जिल्लाका ३४ प्रहरी युनिटमा कार्यरत ट्राफिकसहित ४२५ प्रहरी परिचालन गरिने भएको छ ।
जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक रमेश दत्त अवस्थीका अनुसार चाडपर्व अवधिभर नियमित गस्ती, पैदल गस्ती, सादा पोसाकमा प्रहरी परिचालन र आवश्यकताअनुसार तत्काल परिचालन हुने द्रुत प्रतिक्रिया टोली (क्यूआरटी) तयारी अवस्थामा राखिनेछ ।
बजार, मुख्य सडक, संवेदनशील क्षेत्र, धार्मिक तथा पर्यटकीय स्थल र जिल्ला प्रवेश नाकामा निगरानी बढाइने उनले बताए ।
चाडपर्वका बेला जुवातास, लङ्गुरबुर्जा, पटका तथा विस्फोटक पदार्थको ओसारपसार र प्रयोग, अवैध मदिरा तथा लागुऔषधको कारोबार नियन्त्रणमा समेत प्रहरीले विशेष निगरानी गर्नेछ । जबर्जस्ती चन्दा असुली, चोरी, लुटपाट, पाकेटमारी र अन्य आपराधिक गतिविधि रोक्न प्रहरी परिचालन बढाइनेछ ।
जिल्लाका बसपार्क तथा मुख्य बजार क्षेत्रमा यात्रु सहायता कक्ष सञ्चालन गरी यात्रुलाई सहयोग गर्ने, तोकिएकोभन्दा बढी भाडा असुल्ने र क्षमताभन्दा बढी यात्रु बोक्ने सवारीसाधनमाथि निगरानी गर्ने योजना छ ।
सिद्धार्थ राजमार्गसहित मुख्य सडक र भित्री सडकमा ट्राफिक जाँच तथा गस्ती बढाइनेछ । मादक पदार्थ सेवन गरी सवारी चलाउने, तीव्र गतिमा गाडी चलाउने र क्षमताभन्दा बढी यात्रु राख्ने कार्य नियन्त्रण गरिने प्रहरीले जनाएको छ ।
स्याङ्जा बसपार्क, वालिङ र गल्याङमा यात्रु सहायता कक्ष सञ्चालन गरिनेछ । बैंक तथा वित्तीय संस्था र सुनचाँदी पसल रहेका क्षेत्रमा नियमित गस्ती र सादा पोसाकका प्रहरी परिचालन गरिनेछ । जिल्लाका प्रमुख नाका तथा चेकजाँचस्थलमा निगरानी बढाउनुका साथै आवश्यकताअनुसार ट्राफिक प्रहरीसहित संयुक्त जाँच गरिनेछ ।
चाडपर्वमा घरधनी बाहिर जाने अवस्थालाई ध्यानमा राख्दै खाली घर तथा बजार क्षेत्रमा सुरक्षा निगरानी बढाइनेछ । महिला, बालबालिका र ज्येष्ठ नागरिकविरुद्ध हुन सक्ने अपराध रोकथाम, धार्मिक तथा सांस्कृतिक कार्यक्रम र पर्यटकीय स्थलको सुरक्षा पनि योजनामा समेटिएको छ ।
सम्भावित खाद्यवस्तुको कृत्रिम अभाव, कालोबजारी र म्याद गुज्रिएका वा गुणस्तरहीन सामानको बिक्री नियन्त्रण गर्न जिल्ला प्रशासन, स्थानीय तह तथा सम्बन्धित निकायसँग समन्वय गरिनेछ ।
जिल्ला प्रहरी कार्यालय स्याङ्जाका प्रमुख प्रहरी उपरीक्षक रञ्जित सिंह राठौरले चाडपर्वलाई सुरक्षित र शान्तिपूर्ण बनाउन प्रहरी परिचालनसँगै नागरिकको सहयोग पनि आवश्यक रहेको बताए । उनले घर छाडेर बाहिर जाँदा ढोका राम्रोसँग बन्द गर्न, बहुमूल्य सामान सुरक्षित राख्न र शंकास्पद गतिविधि देखिएमा तत्काल प्रहरीलाई खबर गर्न आग्रह गरेका छन् ।
अनलाइन ठगीबाट जोगिन अपरिचित व्यक्ति वा लिंकमा विश्वास नगर्न, ओटीपी, पासवर्ड, पिन तथा बैंकिङ विवरण अरूलाई नदिन र सामाजिक सञ्जालमार्फत हुने ठगीप्रति सचेत रहन पनि प्रहरीले अनुरोध गरेको छ ।
पटका तथा विस्फोटक पदार्थ प्रयोग नगर्न, मादक पदार्थ सेवन गरेर सवारी नचलाउन र ट्राफिक नियम पालना गर्न प्रहरीले सर्वसाधारणलाई आग्रह गरेको छ ।
कुनै शंकास्पद गतिविधि वा आपराधिक घटना देखिएमा नजिकको प्रहरी कार्यालय वा प्रहरीको आपत्कालीन नम्बर १०० मा जानकारी गराउन सकिने जिल्ला प्रहरी कार्यालयले जनाएको छ ।
