स्याङ्जाको पुतलीबजार नगरपालिका मेयर कप पुरुष भलिबल प्रतियोगिताको उपाधि वडा नम्बर ७ र महिला भलिबलको उपाधि वडा नम्बर १२ ले जितेको छ ।
पुतलीबजार नगरपालिका – १ मालेबगरस्थित कबर्डहलमा ४ दिनसम्म आयोजना भएको पुरुष भलिबल प्रतियोगिताको फाइनल खेलमा वडा नम्बर १२ लाई वडा नम्बर ७ ले हराउँदै मेयर कप पुरुष भलिबलको उपाधि जितेको हो ।
वडा नम्बर ७ ले वडा नम्बर १२ लाई ३ – २ को सेटमा २५ – २३, २२ – २५, २३ – २५, २५ – १४ र १५ – ८ को अंकले पराजित गर्दै विजेता बनेको हो । प्रतियोगितामा वडा नम्बर ६ तेस्रो हुन सफल भएको छ ।
प्रतियोगितामा विजेता टिम वडा नम्बर ७ लाई ८० हजार, दोस्रो वडा नम्बर १२ र तेस्रो वडा नम्बर ६ लाई क्रमशः पचास हजार र तीस हजार रुपैयाँ नगदसहित ट्रफी, मेडल र प्रमाणपत्र प्रदान गरिएको छ । 
त्यसैगरी, महिला भलिबल प्रतियोगिताको फाइनल खेलमा वडा नम्बर १२ ले वडा नम्बर ६ लाई हराउँदै मेयर कप महिला भलिबलको उपाधि जितेको छ ।
वडा नम्बर १२ ले वडा नम्बर ६ लाई ३ – ० को सेटमा २५ – १४, २५ – २२ र २५ – १९ को अंकले पराजित गर्दै विजेता बनेको हो । प्रतियोगितामा वडा नम्बर १३ तेस्रो हुन सफल भएको छ ।
प्रतियोगितामा विजेता टिम वडा नम्बर १२ लाई ४५ हजार, दोस्रो वडा नम्बर ६ र तेस्रो वडा नम्बर १३ लाई क्रमशः ३५ हजार र बीस हजार रुपैयाँ नगदसहित ट्रफी, मेडल र प्रमाणपत्र प्रदान गरिएको छ ।
भलिबल प्रतियोगितामा पुरुषतर्फ उत्कृष्ट खेलाडी सन्जु बिक्रम शाह (वडा ७), उत्कृष्ट सर्भर सुर्य श्रेष्ठ (वडा ७), उत्कृष्ट डिफेन्डर जापान गुरुङ (वडा १२), उत्कृष्ट सेटर अन्जन केसी (वडा ७), उत्कृष्ट स्पाइकर राजु गुरुङ (वडा ६), उत्कृष्ट ब्लकर मनोज भुजेल (वडा १२) र वडा नम्बर ७ का उत्तम थापा उत्कृष्ट प्रशिक्षक भएको नगर खेलकुद विकास समितिका अध्यक्ष याम बहादुर गुरुङले बताए ।
यसैगरी, महिलातर्फ उत्कृष्ट खेलाडी सुदिना गुरुङ (वडा १२), उत्कृष्ट सर्भर दिया गुरुङ (वडा ६), उत्कृष्ट डिफेन्डर लोकशिला गुरुङ (वडा १२), उत्कृष्ट सेटर अनुष्का गुरुङ (वडा ६), उत्कृष्ट स्पाइकर सदिक्षा गुरुङ (वडा १२), उत्कृष्ट ब्लकर पूर्णता शाही (वडा १३) र वडा नम्बर १२ का पदम गुरुङ उत्कृष्ट प्रशिक्षक भएको नगर खेलकुद अध्यक्ष गुरुङले बताए ।
प्रतिक्रिया लेख्नुहोस्:-