स्याङ्जाको चापाकोटमा भएको प्रथम चापाकोट क्रिकेट लिगको उपाधि गण्डकी फायरले जितेको छ । चापाकोट नगरपालिका–९ स्थित गंगालाल माविको खेलमैदानमा शनिबार सम्पन्न फाइनल खेलमा साँखर वरियर्सलाई ५० रनले पराजित गर्दै गण्डकी फायर च्याम्पियन बनेको हो ।
चापाकोट नगर क्रिकेट संघको आयोजना तथा चापाकोट नगरपालिकाको संरक्षकत्वमा सञ्चालन भएको प्रतियोगिताको फाइनल निकै प्रतिस्पर्धात्मक बनेको थियो । टस जितेर पहिले ब्याटिङ रोजेको गण्डकी फायरले निर्धारित २० ओभरमा ८ विकेट गुमाउँदै १५७ रनको योगफल तयार पारेको थियो ।
गण्डकीको जितमा विकल क्षेत्री नायक बने । उनले ४३ बलमा अविजित ८४ रनको शानदार इनिङ्स खेले । उनको आक्रामक ब्याटिङका कारण गण्डकीले सम्मानजनक स्कोर बनाउन सफल भयो । स्वप्निल भट्टराईले १८ रन, विशाल कोइरालाले १५ रन तथा मोहित अधिकारीले ८ रनको योगदान दिएका थिए ।
साँखर वरियर्सका बलरमध्ये सूर्य विक सर्वाधिक सफल रहे । उनले तीन विकेट लिए भने नेल्सन थापाले दुई विकेट हात पारे । महेश गोदार र सुदीप वस्नेतले समान एक–एक विकेट लिए ।
१५८ रनको लक्ष्य पछ्याएको साँखर वरियर्सले सुरुवात राम्रो गर्न नसक्दा दबाबमा परेको थियो । टोलीका महेश गोदारले २५ रन बनाए भने राम बस्ताकोटीले १७ र मनिराम भट्टराईले १२ रन जोडे । अन्य ब्याट्सम्यानले दोहोरो अंकको स्कोर छुन नसक्दा साँखर लक्ष्यभन्दा धेरै पछाडि रह्यो ।
गण्डकी फायरका बलरले पनि कसिलो प्रदर्शन गरे । सुजन बस्याल र स्वप्निल भट्टराईले समान दुई–दुई विकेट लिए । रामचन्द्र ढकाल, सुशिल गौतम, विकल क्षेत्री, प्रदीप घर्ती र विशाल कोइरालाले समान एक–एक विकेट लिएपछि साँखरको इनिङ्स दबाबमा परेको थियो ।
उपाधिसँगै गण्डकी फायरले एक लाख १० हजार रुपैयाँ नगद, शिल्ड, मेडल र प्रमाणपत्र प्राप्त गरेको छ । उपविजेता साँखर वरियर्सले ६० हजार रुपैयाँ नगदसहित ट्रफी, मेडल र प्रमाणपत्र प्रदान गरिएको चापाकोट नगर क्रिकेट संघका अध्यक्ष प्रेमनारायण रेग्मीले जानकारी दिए ।
प्रतियोगितामा गण्डकी फायरले लिग चरणका सबै खेल जित्दै फाइनल यात्रा तय गरेको थियो । यता साँखर वरियर्सले सेमिफाइनलमा कुवाकोट युथ स्टारलाई हराउँदै उपाधि भिडन्त पक्का गरेको थियो ।
वैशाख २६ गतेदेखि सुरु भएको प्रतियोगितामा ह्वाइट हर्ष, गण्डकी फायर, साँखर वरियर्स, कुवाकोट युथ स्टार र रोयल आँधीखोला गरी पाँच टोली सहभागी थिए । प्रतियोगिताको समापन समारोहमा चापाकोट नगरपालिकाकी उपप्रमुख ईशा रानाले विजेता, उपविजेता तथा विभिन्न विधामा उत्कृष्ट खेलाडीलाई पुरस्कार तथा सम्मान प्रदान गरेकी थिइन् ।
