यस वर्षको माध्यमिक शिक्षा परीक्षा (एसइई) नतिजामा स्याङ्जाका सामुदायिक विद्यालयले उल्लेखनीय सफलता हासिल गरेका छन् । जिल्लाबाट ११ जना विद्यार्थीले ४ जीपीए ल्याउँदा सामुदायिक विद्यालयका पाँच विद्यार्थी उत्कृष्ट सूचीमा परेका हुन् ।
शिक्षा विकास तथा समन्वय इकाइ स्याङ्जाका प्रमुख विश्वराज आचार्यका अनुसार ४ जीपीए ल्याउनेमध्ये पाँच जना छात्रा र छ जना छात्र रहेका छन् । सामुदायिक विद्यालयतर्फ पुतलीबजार नगरपालिका–१ स्थित त्रिभुवन आदर्श माध्यमिक विद्यालयका अनिशा रेग्मी, शश्रीक दोरंगा र आयुष्मा ढकालले उत्कृष्ट नतिजा ल्याएका छन् ।
त्यसैगरी आँधीखोला गाउँपालिका–६ को शारदा माध्यमिक विद्यालयकी मनिषा ढकाल र भीरकोट नगरपालिका–३ स्थित शहिद शुक्र माध्यमिक विद्यालयका नितेश काफ्लेले पनि ४ जीपीए प्राप्त गरेका छन् ।
निजी विद्यालयतर्फ पुतलीबजार–१ को रोशनी आवासीय माध्यमिक विद्यालयका प्रशन्नमान श्रेष्ठ, स्याङ्जा माध्यमिक विद्यालयका निश्चल तिवारी, वालिङ नगरपालिका–८ को नेपाल आदर्श माध्यमिक विद्यालयका रोशन सुवेदी, शिष्टता डुम्रे र सोनिया थापा तथा अर्जुनचौपारी गाउँपालिका–१ स्थित अर्जुनचौपारी चिल्ड्रेन एकेडेमीका जेनिश केसीले ४ जीपीए ल्याएका हुन् ।
यस वर्ष स्याङ्जाबाट नियमिततर्फ साधारण धारमा तीन हजार २२३ विद्यार्थी सहभागी भएका थिए । तीमध्ये दुई हजार २३८ जनाले ग्रेड प्राप्त गरेका छन् । प्राविधिक धारतर्फ सहभागी ११५ जनामध्ये ७७ जना उत्तीर्ण भएका छन् ।
जिल्लाभर तीन हजार ३३८ विद्यार्थी परीक्षामा सहभागी हुँदा दुई हजार ३१५ जनाले ग्रेड प्राप्त गरेका छन्, जुन कुल सहभागीको ६९.३५ प्रतिशत हो । यस्तै, एक हजार २३ जना विद्यार्थी नन–ग्रेडिङमा परेका छन् ।
ग्रेडअनुसार हेर्दा ३.६ देखि ४.० जीपीए ल्याउने २२९ जना, ३.२ देखि ३.६ जीपीए ल्याउने ६३४ जना, २.८ देखि ३.२ जीपीए ल्याउने ८४२ जना रहेका छन् । त्यस्तै २.४ देखि २.८ जीपीए ल्याउने ५६३, २.० देखि २.४ जीपीए ल्याउने ४६ तथा १.६ देखि २.० जीपीए ल्याउने एक जना विद्यार्थी रहेका शिक्षा इकाइले जनाएको छ ।
