देशकै ठूलो जलविद्युत आयोजनामध्ये एक कालीगण्डकी ‘ए’ जलविद्युत केन्द्र केही दिनका लागि पूर्ण रूपमा बन्द हुने भएको छ । विद्युत गृहभित्र रहेको इन्लेट भल्ब र टर्बाइनमा समस्या देखिएपछि केन्द्रले उत्पादन रोक्न लागेको हो ।
केन्द्रले जारी गरेको सूचनाअनुसार आज रातिदेखि वैशाख २९ गते बिहानसम्म विद्युत उत्पादन बन्द रहनेछ । यस अवधिमा पावर हाउसमा बृहत् मर्मतसम्भार गरिने जनाइएको छ ।
केन्द्र प्रमुख आत्मेश पौड्यालका अनुसार युनिट–२ को टर्बाइन तथा इन्लेट भल्बमा समस्या देखिएपछि तीनवटै मेसिन बन्द गरेर मर्मत गर्नुपर्ने अवस्था आएको हो । उनका अनुसार एउटा टर्बाइनको भल्बबाट पानी चुहावट भएपछि जोखिम बढ्न सक्ने भएकाले समयमै मर्मत थालिएको हो ।
“सानो समस्या बेवास्ता गर्दा ठूलो क्षति हुन सक्छ, त्यसैले तत्काल मर्मत गर्न लागिएको हो,” पौडेलले बताएका छन् ।
मर्मतका क्रममा सुरुङमार्ग हुँदै पावर हाउसतर्फ जाने पानी नदीमा नै फर्काइने भएकाले कालीगण्डकी नदीको सतह बढ्न सक्ने केन्द्रले जनाएको छ । नदी किनार आसपासका स्थानीयलाई सतर्क रहन पनि आग्रह गरिएको छ ।
नेपाल विद्युत प्राधिकरणको स्वामित्वमा रहेको १४४ मेगावाट क्षमताको यो आयोजना स्याङ्जाको कालीगण्डकी गाउँपालिकामा अवस्थित छ । केन्द्रका अनुसार २९ गते बिहानपछि दुईवटा टर्बाइन मात्रै सञ्चालनमा आउनेछन् भने केही समय ९६ मेगावाट मात्रै विद्युत उत्पादन हुनेछ ।
बाँकी एक टर्बाइनको मर्मत पूरा हुन करिब २५ दिन लाग्ने अनुमान गरिएको छ । त्यसपछि मात्रै आयोजनाले पूर्ण क्षमतामा अर्थात् १४४ मेगावाट उत्पादन गर्ने बताइएको छ ।
आयोजना निर्माणकै समयमा भएको डिजाइन त्रुटिका कारण भल्बमा बेला–बेला समस्या दोहोरिने गरेको प्राविधिकहरूले बताएका छन् ।
