नेकपा एमाले स्याङ्जाले पूर्वप्रधानमन्त्री केपी शर्मा ओलीको गिरफ्तारीविरुद्ध विरोध जनाउँदै प्रशासनमार्फत प्रधानमन्त्रीलाई विरोधपत्र बुझाएको छ ।
एमाले जिल्ला कमिटी स्याङ्जाले पार्टी अध्यक्ष ओलीसहित पूर्वगृहमन्त्री रमेश लेखक पक्राउप्रति आपत्ति जनाउँदै विरोधपत्र बुझाएको छ ।
उक्त पत्र प्रमुख जिल्ला अधिकारीमार्फत प्रधानमन्त्री तथा मन्त्रिपरिषद् कार्यालय, सिंहदरबार पठाइएको हो ।
एमाले स्याङ्जाले हालै गठन भएको सरकारले गौरी बहादुर कार्की आयोगको प्रतिवेदन कार्यान्वयनको नाममा ओली र लेखकलाई पक्राउ गरेको घटनालाई असंवैधानिक र राजनीतिक पूर्वाग्रहबाट प्रेरित भन्दै आपत्ति जनाएको छ ।
पार्टीले यस कदमलाई अलोकतान्त्रिक, प्रतिशोधपूर्ण र गैरकानुनी भएको आरोप लगाएको छ ।
विरोधपत्रमा पार्टी अध्यक्ष ओलीको पक्राउप्रति गम्भीर ध्यानाकर्षण भएको जनाउँदै तत्काल बिनाशर्त रिहाइको माग गरिएको छ ।
एमाले स्याङ्जाले पक्राउ परेका सबै लोकतान्त्रिक पक्षधरहरूलाई तत्काल रिहा नगरे आन्दोलनमा उत्रिने चेतावनी दिएको छ । “यदि माग पूरा भएन भने भोलिदेखि जनताको सहभागितामा सशक्त आन्दोलन सुरु हुनेछ,” विरोधपत्रमा भनिएको छ ।
साथै, भदौ २४ गते भएका हिंसात्मक घटनामा संलग्नमाथि कुनै ठोस कारबाही नहुनु र आयोग मौन रहनु खेदजनक रहेको उल्लेख गरिएको छ । सो घटनाको निष्पक्ष छानबिनका लागि उच्चस्तरीय न्यायिक आयोग गठन गर्न पनि माग गरिएको छ ।
पार्टी जिल्ला अध्यक्ष सूर्यप्रसाद गैह्रे ‘पारस’द्वारा हस्ताक्षरित उक्त पत्रमा आन्दोलनबाट उत्पन्न हुने सम्पूर्ण परिस्थितिको जिम्मेवारी सरकार र प्रशासनले लिनुपर्ने समेत उल्लेख गरिएको छ ।
