काठमाडौं — सामाजिक सञ्जाल प्रयोग गरी अनलाइन ठगी गर्ने एक व्यक्ति पक्राउ परेका छन् । प्रहरीले ठगीमा संलग्न रहेको आरोपमा स्याङ्जाका एक युवकलाई काठमाडौंबाट नियन्त्रणमा लिएको हो ।
प्रहरीका अनुसार टिकटकमार्फत चिनजान बढाई व्हाट्सएपमा कुराकानी गर्दै महिलाहरूलाई विशेष रूपमा लक्षित गरी ठगी गर्ने कार्य भइरहेको सूचनाका आधारमा अनुसन्धान अघि बढाइएको थियो । आरोपितले आफू अमेरिकन आर्मीमा कार्यरत रहेको भन्दै विभिन्न बहाना बनाउने, नेपालमा बिदामा आएको र जग्गाको कर तिर्न समस्या परेको जस्ता झुटा आश्वासन दिने गरेको खुलेको छ ।
यस्तै, आफ्नो बैंक खातामा ‘लिमिट’ लागेको भन्दै विभिन्न व्यक्तिसँग रकम माग गरी ठगी गर्ने गरेको पनि अनुसन्धानबाट खुलेको काठमाडौं उपत्यका अपराध अनुसन्धान कार्यालयलयका प्रहरी उपरीक्षक मनोहर प्रसाद भट्टले जानकारी दिए ।
यसैक्रममा प्रहरीले विशाल थापा क्षेत्री नाम बताउने भेषराज वाग्लेलाई काठमाडौंबाट पक्राउ गरेको हो । पक्राउ पर्ने वाग्ले स्याङ्जाको बिरुवा गाउँपालिका–२ का ३४ वर्षीय रहेको प्रहरीले जनाएको छ ।
उनलाई चन्द्रागिरि नगरपालिका–७ थानकोटबाट पक्राउ गरी थप अनुसन्धान तथा कारबाहीका लागि जिल्ला प्रहरी परिसर काठमाडौं पठाइएको छ ।
प्रहरीले सामाजिक सञ्जालमार्फत अपरिचित व्यक्तिसँग आर्थिक कारोबार नगर्न तथा यस्ता प्रलोभनमा नपर्न सर्वसाधारणलाई सचेत रहन आग्रह गरेको छ ।
