स्याङ्जाको भीरकोट नगरपालिकामा एकदिने निःशुल्क स्वास्थ्य शिविर सञ्चालन हुने भएको छ । स्थानीय नागरिकलाई विशेषज्ञ स्वास्थ्य सेवा सहज रूपमा उपलब्ध गराउने लक्ष्यसहित शिविर आयोजना गर्न लागिएको हो ।
भीरकोट नगरपालिका र मनमोहन मेमोरियल मेडिकल एण्ड टिचिङ हस्पिटलको संयुक्त आयोजनामा हुने शिविर चैत ७ गते शनिबार बिहान ८ बजेदेखि भीरकोट नगर अस्पताल, हेलुमा सञ्चालन गरिनेछ ।
शिविरको सम्पूर्ण तयारी पूरा भइसकेको जानकारी दिँदै नगर प्रमुख गोविन्द कुमार कर्माचार्यले नगरवासीलाई सक्रिय सहभागिताका लागि आग्रह गरेका छन् । “विशेषज्ञ चिकित्सकबाट प्रत्यक्ष परीक्षण र परामर्श पाउने अवसर विरलै हुन्छ, त्यसैले सबैले यसको लाभ लिनुहोस्,” उनले भने ।
उनका अनुसार ग्रामीण तथा अर्ध–शहरी क्षेत्रका नागरिकलाई लक्षित गर्दै यस्तो कार्यक्रम ल्याइएको हो, जसले स्वास्थ्य सेवामा पहुँच विस्तार गर्न सहयोग पुग्ने अपेक्षा गरिएको छ ।
शिविरमा विभिन्न विधाका विशेषज्ञ चिकित्सकहरूले सेवा दिनेछन् । स्त्री तथा प्रसूति, जनरल मेडिसिन, हाड–जोर्नी तथा नशासम्बन्धी रोगका साथै नाक, कान, घाँटी र मानसिक स्वास्थ्यसम्बन्धी समस्या भएका बिरामीहरूको निःशुल्क परीक्षण तथा परामर्श गरिने आयोजकले जनाएको छ ।
स्त्री तथा प्रसूति सेवामा डा. मनोर दिन सैयद, जनरल मेडिसिनतर्फ डा. इवराज सिम्खडा र डा. कृष्ण गुप्ता, हाड–जोर्नी तथा नशासम्बन्धी उपचारमा डा. उजोन शाक्यले सेवा प्रदान गर्नेछन् । यस्तै, नाक–कान–घाँटीका लागि डा. कृष्ण कोइराला, मानसिक तथा स्नायुसम्बन्धी सेवामा डा. राजन शर्मा र हाड–जोर्नीसम्बन्धी उपचारमा डा. दिनेश कुमार विकले सेवा प्रदान गर्नेछन् ।
शिविरमा आउने बिरामीलाई स्वास्थ्य परीक्षण, आवश्यक परामर्श र रोगसम्बन्धी सुझाव पूर्ण रूपमा निःशुल्क उपलब्ध गराइनेछ । यसबाट विशेषगरी आर्थिक रूपमा कमजोर तथा नियमित स्वास्थ्य परीक्षण गर्न नसक्ने नागरिक लाभान्वित हुने अपेक्षा गरिएको छ ।
स्वास्थ्य क्षेत्रका जानकारहरूका अनुसार समयमै रोग पहिचान र उपचार गर्न सके जटिल समस्या हुनबाट बच्न सकिन्छ । यस्ता शिविरले स्वास्थ्य सचेतना बढाउनुका साथै प्रारम्भिक अवस्थामै रोग पहिचानमा महत्वपूर्ण भूमिका खेल्ने विश्वास गरिएको छ ।
नगरपालिकाले आगामी दिनमा पनि यस्ता जनमुखी कार्यक्रमलाई निरन्तरता दिने जनाएको छ । स्थानीयस्तरमै गुणस्तरीय स्वास्थ्य सेवा विस्तार गर्ने उद्देश्यका साथ अघि बढाइएको यो अभियानबाट सयौं नागरिक प्रत्यक्ष लाभान्वित हुने अपेक्षा गरिएको छ ।
