स्याङ्जाको अर्जुनचौपारी गाउँपालिका–१ स्थित पञ्चकन्या तथा जलवराह धार्मिक वन केटीचौर (सिमलचौर) मा रहेको नवग्रह मन्दिरमा यस वर्षको महाशिवरात्री विशेष बनाइने भएको छ । महाशिवरात्रीकै दिन जिल्लामै पहिलो पटक अन्तरविद्यालय भजन प्रतियोगिता आयोजना गरिनुका साथै विशेष पूजा र दीप प्रज्वलन कार्यक्रम हुने भएको हो ।
अर्जुनचौपारी गाउँपालिकाको वार्षिक कार्यक्रम अन्तर्गत फागुन ३ गते बिहान १० बजेदेखि ‘प्रथम स्याङ्जा अन्तरविद्यालय भजन प्रतियोगिता’ सञ्चालन हुने गाउँपालिकाले जनाएको छ । विद्यार्थीमा रहेको अन्तर्निहित प्रतिभा उजागर गर्दै मौलिक संस्कार, संस्कृति र आध्यात्मिक चेतनाको प्रवर्द्धन गर्ने उद्देश्यले प्रतियोगिता आयोजना गर्न लागिएको गाउँपालिकाका अध्यक्ष प्रकाश तिवारीले जानकारी दिए ।
प्रतियोगितामा स्याङ्जा जिल्लाभित्रका सामुदायिक तथा निजी विद्यालयले सहभागिता जनाउन सक्नेछन् । प्रस्तुत गरिने भजनमा अर्जुनचौपारी र स्याङ्जाको धार्मिक पर्यटन, स्थानीय मौलिकता, आध्यात्मिक भाव र नैतिक सन्देश झल्किनुपर्ने गाउँपालिकाको भनाइ छ । परम्परागत भजन–कीर्तनलाई प्राथमिकता दिइनेछ ।
प्रतियोगितामा प्रथम हुने समूहलाई २५ हजार, द्वितीयलाई १५ हजार र तृतीयलाई १० हजार रुपैयाँ पुरस्कार प्रदान गरिनेछ । विद्यार्थीहरूले भजनको गरिमा झल्किने मौलिक वा विद्यालयको औपचारिक पोशाक लगाउनुपर्नेछ । गाउँपालिकाले ‘मौलिक संस्कृति र आध्यात्मिक चेतनाको प्रवर्द्धनमा हाम्रो प्रतिबद्धता’ भन्ने नारासहित कार्यक्रम आयोजना गर्न लागेको जनाएको छ ।
यसैबीच, महाशिवरात्रीको अवसरमा नवग्रह मन्दिरमा विशेष पूजा कार्यक्रम पनि आयोजना गरिने मन्दिर व्यवस्थापन समितिले जनाएको छ । गत वर्ष महाशिवरात्रीकै दिन प्राणप्रतिष्ठा सम्पन्न भएको मन्दिरमा यस वर्ष नौ लाख ९९ हजार ९९९ दीप प्रज्वलन गरिने समितिका अध्यक्ष भरतराज पोखरेलले जानकारी दिए । सोही दिन चर्चित गायक पशुपति शर्मा लगायतको सांगीतिक प्रस्तुति पनि रहनेछ ।
नेपालमै पहिलो पटक अर्जुनचौपारी गाउँपालिकाको वडा नम्बर १ मा निर्माण गरिएको नवग्रह मन्दिर हाल धार्मिक पर्यटनको नयाँ गन्तव्यका रूपमा विकसित हुँदै गएको छ । करिब आठ हेक्टर क्षेत्रफलमा फैलिएको धार्मिक वनभित्र नवभुज आकारको २७ फिट अग्लो मन्दिर निर्माण गरिएको छ । मन्दिरको स्तम्भको सबैभन्दा माथिल्लो भागमा आकाशतर्फ फर्किएको सौर्यमण्डलीय ब्रह्माण्डको प्रतीक राखिएको छ, जसले यस क्षेत्रलाई धार्मिकसँगै सांस्कृतिक र पर्यटकीय रूपमा समेत आकर्षक बनाएको स्थानीयको भनाइ छ ।
