स्याङ्जा जिल्लाका किशोरीलाई पाठेघरको मुखको क्यान्सरबाट जोगाउने उद्देश्यसहित ‘ह्युमन पापिलोमा भाइरस’ (एचपिभी) खोप अभियान सञ्चालन हुने भएको छ । फागुन ४ र ५ गते दुई दिन चल्ने अभियानमार्फत जिल्लाभरका १ हजार ७ सय ९१ किशोरीलाई खोप लगाइने छ ।
जिल्लाका ९७ वडामा रहेका २ सय ३४ विद्यालयमा कक्षा ६ मा अध्ययनरत छात्रा तथा विद्यालय नजाने १० वर्ष उमेर समूहका किशोरीलाई खोप दिइने तयारी गरिएको प्रदेश जनस्वास्थ्य कार्यालय स्याङ्जाले जनाएको छ । खोप पूर्ण रूपमा सुरक्षित रहेको उल्लेख गर्दै कार्यालय प्रमुख रामबहादुर नेपालीले अभिभावक र किशोरीलाई ढुक्क भएर खोप लगाउन आग्रह गरेका छन् ।
खोप अभियानका क्रममा निजी तथा सामुदायिक दुवै खालका विद्यालयमै खोप केन्द्र स्थापना गरिने छ । यससँगै अघिल्लो वर्ष खोप लगाउन छुट भएका कक्षा ७ देखि १० सम्मका छात्रा र विद्यालय नजाने ११ देखि १४ वर्ष उमेर समूहका किशोरीलाई पनि समेटिने जनाइएको छ । जिल्लामा अभियान एकै चरणमा सञ्चालन हुनेछ ।
अभियानलाई प्रभावकारी बनाउन २ सय ३४ स्वास्थ्यकर्मी र त्यत्तिकै संख्यामा स्वयंसेवक परिचालन गरिने छ । महिलाको शारीरिक तथा प्रजनन स्वास्थ्यसँग प्रत्यक्ष जोडिएको यस अभियान सफल बनाउन सबै पक्षको सहकार्य अपरिहार्य रहेको सूचना अधिकारी विनोदप्रसाद भट्टले बताए । उनले पाठेघरको मुखको क्यान्सर जस्तो गम्भीर रोगविरुद्ध सचेत रहँदै कोही पनि खोपबाट वञ्चित नहुनुपर्नेमा जोड दिए । अभियानमा छुटेकालाई थप एक सातासम्म समेट्ने व्यवस्था गरिने पनि जानकारी दिए ।
जिल्ला खोप समन्वय समितिका संयोजक मनिषकुमार महतोका अनुसार अभियानअघि नै प्रचारप्रसारलाई तीव्र बनाइएको छ, ताकि कुनै अवरोध नआओस् । उनले खोप सुरक्षित भएकाले भ्रामक सूचनामा नपर्न सबैलाई आग्रह गरे । ११ वटै पालिकामा वडास्तरमै खोप सञ्चालनको तयारी अन्तिम चरणमा पुगेको प्रदेश जनस्वास्थ्य कार्यालयले जनाएको छ ।
यस वर्ष फागुन ४ र ५ गते पुतलीबजारमा २ सय ९५, वालिङमा ४ सय ४, भीरकोटमा १ सय ६९, गल्याङमा २ सय १, चापाकोटमा १ सय ६२, फेदीखोलामा १ सय ३, आँधीखोलामा ८६, अर्जुनचौपारीमा १ सय ९, बिरुवामा ७२, हरीनासमा ८० र कालीगण्डकीमा १ सय १० किशोरीलाई खोप लगाइने छ । तीमध्ये १ हजार ७ सय ९० जना विद्यालय जाने किशोरी हुन् भने अर्जुनचौपारीमा १ जना विद्यालय नजाने किशोरी रहेको कार्यालयले जनाएको छ ।
गत वर्ष मात्रै स्याङ्जामा ९ हजार ५ सय ५ जनालाई एचपिभी खोप लगाइएको तथ्यांक छ ।
