स्याङ्जामा १५ वर्षीया बालिका मृत्यु प्रकरणका फरार एक प्रतिवादीलाई प्रहरीले पक्राउ गरेको छ । पुतलीबजार नगरपालिका–१३ मा बस्ने १५ वर्षीया बालिकाको मृत्यु भएको घटनासँग सम्बन्धित प्रतिवादी लामो समयदेखि फरार रहँदै आएका थिए ।
२०८० चैत ११ गते बालिकाको मृत्यु भएपछि प्राप्त जाहेरीका आधारमा अनुसन्धान अघि बढाएको प्रहरीले स्थानीय ४४ वर्षीय राजेन्द्र प्रसाद तिवारीलाई शुक्रबार पक्राउ गरेको हो । घटना पश्चात् लुकिछिपी बस्दै आएका तिवारीलाई पोखरा महानगरपालिका–१७, बिरौटाबाट नियन्त्रणमा लिइएको प्रहरी निरीक्षक सागर कार्कीले जानकारी दिए ।
गण्डकी प्रदेश प्रहरी कार्यालय पोखरा, कास्की र जिल्ला प्रहरी कार्यालय स्याङ्जाबाट खटिएको संयुक्त टोलीले उनलाई पक्राउ गरेको हो । पक्राउपछि तिवारीलाई ज्यानसम्बन्धी कसुर (कर्तव्य ज्यान) मुद्दामा स्याङ्जा जिल्ला अदालतबाट सात दिनको म्याद थप गरी थप अनुसन्धान प्रक्रिया अघि बढाइएको प्रहरी निरीक्षक सागर कार्कीले बताए ।
जिल्ला प्रहरी कार्यालय स्याङ्जाका प्रमुख प्रहरी उपरीक्षक दधिराम न्यौपानेले यस घटनालाई सूक्ष्म तवरले अनुसन्धान गर्ने बताउँदै घटनासँग सम्बन्धित तथ्य र प्रमाण संकलनको काम तीव्र रूपमा भइरहेको जानकारी दिए ।
