स्याङ्जाको भीरकोट नगरपालिकाले चाडपर्व नजिकिँदै गर्दा बजार अनुगमनलाई कडाइ गरेको छ । बिहीबार गरिएको अनुगमनमा कैफियत देखिएका १३ वटा खाद्यान्न पसल कारबाहीमा परेका छन् ।
नगर उपप्रमुख भगवती रेग्मी अर्यालका अनुसार अनुगमन टोलीले वडा नम्बर १ र २ को ठाडोलाइन र सिद्धार्थ राजमार्ग आसपासका पसलहरूमा कारबाही गरेको हो । कुल ३४ वटा पसलमा गरिएको अनुगमनका क्रममा मासु पसल, किराना पसल, होटल तथा रेष्टुरेन्ट, फलफूल–तरकारी पसल र भेटेरिनरी पसल जाँच गरिएको नगर प्रशासन प्रमुख सीताराम खनालले जानकारी दिए ।
उनका अनुसार पाँचवटा मासु पसल, २० वटा किराना पसल, तीनवटा होटल तथा रेष्टुरेन्ट, चारवटा तरकारी–फलफूल पसल र दुईवटा भेटेरिनरी पसल अनुगमन गरिएको थियो । सो क्रममा १३ खाद्यान्न पसलबाट म्याद गुज्रेका साबुन, मसला, चाउचाउ, बिस्कुटलगायतका वस्तु जफत गरिएको छ ।
अनुगमनका क्रममा व्यवसाय दर्ता नगरी सञ्चालन, मूल्यसूची अद्यावधिक नगर्ने, नवीकरण नगरेको, बोर्ड नराखेको, इजाजतपत्रबिना सुर्तीजन्य पदार्थ बिक्री गर्ने, सरसफाइको कमी देखिएका पसललाई सचेत गराइएको खनालले बताए ।
स्थानीय उपभोक्ताहरूका अनुसार पर्वको समयमा मात्र अनुगमन गर्ने प्रवृत्तिका कारण धेरै समस्या देखिने गरेको छ । उनीहरूले नियमित अनुगमन र व्यापारी तथा उपभोक्तालाई सचेतनासहित शिक्षा दिन सके बजार अझ व्यवस्थित हुने सुझाव दिएका छन् ।
