गण्डकी प्रदेशसभाको नयाँ भवन निर्माणको कार्य औपचारिक रूपमा मंगलबारदेखि सुरु भएको छ । पोखरा महानगरपालिका –३ नदीपुरस्थित हाल प्रयोग भइरहेका संरचनाको पछाडि ७ रोपनी क्षेत्रमा बन्न लागेको भवनको शिलान्यास मुख्यमन्त्री सुरेन्द्रराज पाण्डेले गरे ।
२५ करोड ३७ लाख रुपैयाँमा बन्न लागेको भवन २०८४ माघ १७ भित्र सम्पन्न गर्ने लक्ष्य छ । तर मुख्यमन्त्री पाण्डेले निर्माण कम्पनीलाई निर्धारित तीन वर्ष नपर्खी दुई वर्षमै काम सक्न निर्देशन दिएका छन् । “निर्माण अवधि ३ वर्षको भए पनि २ वर्षमै सकिदिनुस्, हाम्रो कार्यकालमै सभा बस्न मिल्ने होस्,” उनले भने ।
२०७८ साउन २१ मा ४४ करोड ९४ लाख ९१ हजार रुपैयाँको लागत इस्टिमेटसहित बोलपत्र आव्हान गरिएको थियो । ३५ कम्पनीले प्रस्ताव पेस गरे पनि न्यूनतम लागत प्रस्तुत गर्ने श्रेष्ठ एन्ड सन्स–इस्ट बेस्ट जेभी, नयाँबानेश्वरलाई जिम्मेवारी दिइएको हो । सम्झौता गत माघ १८ गते भएको थियो ।
शहरी विकास तथा भवन कार्यालय कास्कीका प्रमुख सी.डी.ई ओमराज ढुंगानाका अनुसार नगर विकास प्रशिक्षण केन्द्रको स्वामित्वमा रहेको ११० रोपनीमध्ये ७ रोपनी क्षेत्रमा नयाँ भवन बन्न लागेको हो । अहिले निर्माणस्थलमा डन्डी तेर्स्याउने र जमीन सम्याउने प्रारम्भिक काम भइरहेको छ ।
नयाँ भवन तीन तले हुनेछ । भुईंतलामा मुख्यमन्त्री, सभामुख, उपसभामुख, विपक्षी दलका नेता र संसद् सचिवालय सचिवको कार्यालय रहनेछ । साथै ५ वटा संसदीय दल बैठक कक्ष र ५ भीआईपी कार्यालय रहनेछन् ।
पहिलो तलामा संसद् बैठक कक्ष (७८ जना अट्ने), कार्यव्यवस्था परामर्श समितिको बैठक कक्ष, सामान्य र भीआईपी कक्ष, लाइब्रेरी, भिडियो कन्फरेन्स र टिभी स्टुडियो रहनेछ । दोस्रो तलामा ८० जना क्षमताको दर्शक दीर्घा, बहुउद्देश्यीय बैठक कक्ष, स्टोर र बार्दली रहनेछ । तेस्रो तलामा के – के राख्ने अझै टुंगो लागेको छैन भने बाहिरी भागमा चमेनागृह र पार्किङ निर्माण गरिनेछ ।
यसअघि डेढ अर्बको डीपीआर बने पनि कार्यान्वयन असम्भव देखिएपछि नयाँ डीपीआरमार्फत हालको योजना अघि बढाइएको हो । चालू वर्षका लागि ९ करोड रुपैयाँ विनियोजन गरिएको छ । सभामुख कृष्ण धितालका अनुसार योजनाको कार्यान्वयन सहरी विकास तथा भवन कार्यालयले गर्नेछ ।
