नेपाली कांग्रेसका वरिष्ठ नेता डा. शेखर कोइरालाले पार्टीभित्रको तिक्तता अन्त्य नगरी कांग्रेस सबल र प्रभावकारी बन्न नसक्ने स्पष्ट पारेका छन् । डा. कोइरालाले पार्टी एकता र सबल संगठन निर्माणका लागि आन्तरिक तिक्तता हटाउन जरुरी रहेको बताएका हुन् ।
स्याङ्जाको भीरकोटमा आयोजित स्व. कमलप्रसाद पंगेनीको सातौं स्मृति सभा तथा स्मृति प्रतिष्ठानको प्रथम अधिवेशनको अवसरमा बोल्दै डा. कोइरालाले पार्टी निर्माणका लागि आपसी गुटबन्दी, आरोप–प्रत्यारोप र वैमनस्यताबाट माथि उठ्न आवश्यक रहेको बताए । उनले भने, “कांग्रेसमा दुई खेमा छन्, तर ती दुई धारबीचको तिक्तता अन्त्य गरेर मात्र सहकार्य सम्भव हुन्छ ।”
स्व. कमल पंगेनी र आफू फरक धारमा रहेपनि गहिरो मित्रता रहेको स्मरण गर्दै डा. कोइरालाले भने, “उहाँप्रति सच्चा श्रद्धाञ्जली भनेको उहाँलाई एकल उम्मेदवार बनाएर जिताउनु हो । पार्टीलाई बलियो बनाउन त्याग र समर्पण आवश्यक छ ।”
यस्तै, कार्यक्रममा डा. शेखर कोइरालाले संविधान संशोधन दुई ठूला पार्टी नेपाली कांग्रेस र नेकपा एमाले मात्र मिलेर सम्भव नहुने स्पष्ट पारेका छन् । उनले संशोधन जस्तो संवेदनशील विषयमा सबै दललाई समेटेर अघि बढ्नुपर्ने धारणा राखेका थिए ।
डा. कोइरालाले कांग्रेस र एमालेको संयुक्त सरकारको औचित्य पुष्टि गर्न नसकिएको टिप्पणी गरेका थिए । डा. कोइरालाले यस्तो सरकारको कुनै अर्थ नरहेको धारणा पनि राखेका थिए ।
त्यस्तै, पार्टीको अधिवेशन चार वर्षमा हुने व्यवस्था भएतापनि, एक वर्ष र थप ६ महिनासम्म लम्ब्याउन सकिने प्रावधान औँल्याउँदै डा. कोइरालाले त्यसको पनि कारण सार्वजनिक गर्नुपर्ने बताए । उनले अधिवेशन लम्ब्याउने विषयमा पनि स्पष्टता हुनुपर्ने भन्दै पार्टी सञ्चालनमा पारदर्शिता र विधिको पालना आवश्यक रहेको धारणा व्यक्त गरेका थिए । “शुसिलको पालामा संविधान रोकियो, अहिले अधिवेशन रोक्न ‘क्रियाशील सदस्य’को बहाना बनाइएको छ,” उनको आरोप थियो ।
डा. कोइरालाले पार्टीभित्र संस्कार र अनुशासनको खाँचो औंल्याउँदै प्रचण्डसँगको भेटघाटलाई लिएर उठेका प्रश्नप्रति प्रतिक्रिया दिएका थिए । डा. कोइरालाले भने, “ठूला नेताबीच भेटघाट संस्कार हो, यो संस्कार सबैले बसाल्नुपर्छ ।” यसैगरी, डा. कोइरालाले चर्चामा रहेको बहुविवाहसम्बन्धी कानुनबारे पनि स्पष्ट असहमति जनाउँदै यस्तो कानुन पास हुन नहुने विचार व्यक्त गरेका थिए ।
कार्यक्रममा नेपाली कांग्रेसका उपसभापति धनराज गुरुङले पार्टीभित्रको ‘खुट्टा तान्ने प्रवृत्ति’प्रति तीव्र आलोचना गरेका थिए । “बिपीले बनाएको घर चुहिन थालेको छ, छाउनु पर्ने हो । तर यहाँ खुट्टा तानेर पहिला बन्ने प्रतिस्पर्धा चलेको छ,” गुरुङले भने ।
२०४६ सालपछिका नेताहरूको सम्पत्ति छानबिनको माग गर्दै उनले “पारदर्शिता नभएसम्म पार्टी सबल हुँदैन” भने । स्व. पंगेनीको योगदान उल्लेख गर्दै गुरुङले “उहाँका कामहरू एक ग्रन्थ बन्न सक्ने खालका छन्, सच्चा योद्धाको सम्मान गर्न खुट्टा तान्ने प्रवृत्ति त्याग्नुपर्छ” भने ।
कार्यक्रमकै क्रममा डा. कोइरालाले भीरकोट–बयरघारी–मोहनडाँडा–ठूलीभञ्ज्याङ हुँदै पर्वत जोड्ने सडकलाई ‘कमल पंगेनी मार्ग’ नामकरण गर्ने घोषणा समेत गरेका थिए ।
कार्यक्रममा कांग्रेसका केन्द्रिय सहमहामन्त्री भीष्मराज आङदाङवे, केन्द्रिय सदस्य टेकप्रसाद गुरुङ, सरस्वती तिवारी, गण्डकी प्रदेश सभापति शुक्रराज शर्मा, उपसभापति कल्पना तिवारी, मेखलाल श्रेष्ठ, स्याङ्जा सभापति राजु थापा, गण्डकी प्रदेश सांसद भोजराज अर्याल, स्याङ्जा प्रवक्ता भरत लम्साललगायतले स्मृतिश्रद्धाञ्जली अर्पण गर्दै स्व. पंगेनीको योगदानको उच्च प्रशंसा गरेका थिए ।
