स्याङ्जाको अर्जुनचौपारी गाउँपालिकामा आयोजित `प्रथम अर्जुनचौपारी फुटबल कप – २०८२´ को उपाधि भाया एफसी पोखराले हात पारेको छ ।
अर्जुनचौपारी गाउँपालिका – १ अर्जुनचौपारी खेलमैदानमा आयोजित प्रतियोगितामा पुतलीखेत एफसीलाई हराउँदै भाया एफसी विजेता बनेको हो ।
भाया एफसी पोखराले पुतलीखेत फुटबल क्लबलाई ट्राइबेकरमा ३–१ को गोलले पराजित गरेको हो । निर्धारित समयमा ३–३ गोलको बराबरीमा खेल सकिएपछि खेल ट्राइबेकरमा पुगेको थियो ।
युथ्स फर अर्जुनचौपारीले पहिलोपटक आयोजना गरेको खुल्ला क्लब स्तरीय सेभेन ए साइड फुटबल प्रतियोगितामा भाया एफसीले उपाधिसहित ७१ हजार १११ रुपैयाँ नगदसहित शिल्ड र मेडल हात पारेको छ ।
पालिकामै पहिलोपटक आयोजना गरिएको फुटबल प्रतियोगिता उपविजेता बनेको पुतलीखेत एफसीले ४१ हजार १११ रुपैयाँ नगदसहित शिल्ड र मेडलमा चित्त बुझाएको छ ।
यस्तै, तेस्रो बनेको बयरघारी युथ क्लबले २१ हजार १११ रुपैयाँ नगदसहित शिल्ड र मेडल प्राप्त गरेको छ ।
वैशाख २६ बाट सुरु भएको उक्त प्रतियोगतामा स्याङ्जा, कास्की, पर्वतका गरी १५ क्लबको सहभागिता रहेको क्लबका अध्यक्ष विवेक भुसालले बताए ।
प्रतियोगितामा बेस्ट प्लेयर, बेस्ट गोलकिपर, बेस्ट डिफेन्डर र बेस्ट स्ट्राइकरलाई मेडलसहित पुरस्कृत गरिएको आयोजकले जनाएको छ ।
