नेपालमै पहिलोपटक निर्माण भएको नवग्रह मन्दिरको अनुष्ठान, गीता ज्ञान महायज्ञ तथा धार्मिक महोत्सवमा ७७ लाख रुपैयाँ बढी भेटी रकम संकलन भएको छ ।
भक्तजनको आगमनसँगै मन्दिरको भेटीलगायत शीर्षकमा आम्दानी भएको हो । नगद, बैंक क्युआर तथा खाद्य सामाग्री बिक्रीबाट ७७ लाख ६९ हजार तीन सय २९ रुपैयाँ भेटी रकम संकलन भएको नवग्रह मन्दिर व्यवस्थापन समितिका अध्यक्ष भरतराज पोख्रेलले जानकारी दिए ।
सहयोग रसिद तथा बैंक क्युआरबाट ५९ लाख दस हजार आठ सय ८९ रुपैयाँ, दान पेटिकाबाट १६ लाख २६ हजार छ सय ६५ रुपैयाँ र चामल, धान, आलू, आटा खाद्य सामाग्री बिक्री गर्दा दुई लाख ३१ हजार सात सय ७५ रुपैयाँ भेटी संकलन भएको अध्यक्ष पोख्रेलले बताए ।
स्याङ्जाको अर्जुनचौपारी गाउँपालिका – १ जलबराह धार्मिक वनमा निर्माण भएको नेपालकै पहिलो नवग्रह मन्दिरको अनुष्ठान, गीता ज्ञान महायज्ञ तथा धार्मिक महोत्सवमा एक लाख २५ हजार भन्दा बढी भक्तजनले पूजाआजा तथा दर्शन गरेका थिए ।
१४४ बर्षमा आएको महाकुम्भको समयमा फागुन ६ गतेबाट नौ दिन महाशिवरात्रीसम्म धार्मिक महोत्सव गरिएको थियो । पहिलो दिनबाटै भक्तजनको भीड लागेको नवग्रह मन्दिरमा दैनिक जसो लाइनमा बसेर भक्तजनले पूजा तथा दर्शन गर्नु परेको थियो । धार्मिक महोत्सवमा छिमेकी देश भारत, नेपालभित्रका सबै जिल्लाका भक्तजनले यहाँको नवग्रह मन्दिरमा पूजाआजा र दर्शन गरेको गाउँपालिका अध्यक्ष प्रकाश तिवारीले बताए ।
महोत्सवमा एक करोड २५ लाख दीप प्रज्वलन, चार बेदको पाठ पारायण, गायत्री मन्त्रद्धारा सवालाख हवन, धार्मिक अन्तरक्रिया, सन्ध्याकालिन महाआरती तथा भजनकृतन गरिएको थियो ।
नवग्रह मन्दिर अनुष्ठान एवं धार्मिक महोत्सवमा आचार्य श्री चैतन्य कृष्ण महाराज गूरु प्रमुख वाचक रहेका थिए भने डाक्टर केएन स्वामी, युवा पण्डित प्रशान्त ढकालले समेत धार्मिक प्रवचन दिएका थिए ।
महोत्सवमा गायक खुमन अधिकारी, गायिका देवी घर्ती मगरले आफ्ना साङ्गितिक प्रस्तुति समेत राखिएको थियो । महोत्सवको अन्तिम दिन महाशिवरात्रीमा गायक टेक नारायण चापागाईं र गायिका देवी घर्ती मगरको स्वरमा रहेको नवग्रह भजन ‘नवग्रह तिम्रै चरणमा छौं, तिम्रै सरण पर्छौँ’ बोलको गीतको भिडियो छायांकन समेत गरिएको थियो ।
१५७ रोपनी क्षेत्रफलमा फैलिएको यस धार्मिक वनमा नवभूज आकारको आकाशतर्फ फर्केको २७ फिट अग्लो नवग्रह मन्दिर बनाइएको छ । यस मन्दिरमा रहने पिल्लरको सबैभन्दा माथि आकाशतर्फ फर्काएर सौर्यमण्डलीय ब्रह्माण्डको प्रतीक राखिएको छ ।
पिल्लरको १४ फिटमा सूर्य, शुक्र, केतु, चन्द्र, मंगल, बुध, शनि, बृहस्पति र राहुका प्रतीक राखिएको छ भने पिल्लरको नौवटा भुजामा ग्रह अनुसारका रंग लगाइएको छ । नवग्रह मन्दिरसङ्गै षट्कोण शिवालय बनाइएको छ भने यसको बीचमा पशुपतिनाथको जस्तै पञ्चमुखी शिवलिङ्ग (सात क्वीन्टल) र कोणमा गणेश, कुलदेवता, लक्ष्मी, कालभैरव, हनुमानको मूर्ति राखिएको छ ।
मन्दिरमा षट्कोणको एक छेउबाट प्रवेश गरेर गणेश, कुलदेवता (तेलको पोखरी), इष्टदेवताको पूजा गरेर बीचमा रहेको पञ्चमुखी शिवलिङ्गको दुई पटक घुमेर पूजा गरेसङ्गै हनुमान, लक्ष्मी, कालभैरवको पूजा गरेर बाहिर निस्किने बनाइएको छ ।
यहाँ नव्रग्रह यन्त्र, शिवयन्त्र र एक मण्डला समेत निर्माण गरिएको छ भने मन्दिरमा विवाह नहुने हुँदा सँगै रहेको राधाकृष्ण मन्दिरको मर्मत समेत गरिएको छ । यहाँ षट्कोण शिवालयका मूर्तिको अस्तित्वमा रहेको कर्णको मूर्ति नवग्रह फर्काएर करिब तीन मिटर पूर्वको जङ्गलमा राखिएको छ ।
नवग्रह मन्दिर शनिबार मात्र खुला हुनेछ भने नौमध्ये एक चक्रमा भने हरेक दिनमा पनि पूजा गर्न सकिने छ । सौर्यमण्डलीय ब्रह्माण्डको मूर्ति भने हरेक वर्षको गणेश चतुर्थीमा मात्र हेर्न पाइने छ भने सो दिन पालिका नै बिदा गरेर पूजा गरिने छ ।
मूल नवग्रह मन्दिर पालिकाको वडा नं. – १ मा रहेपनि अन्य नौवटा निशान प्रतीमा पालिकाका अन्य पाँच वडा तथा भौगोलिक स्वरूप ब्रह्माण्डीय स्वरूपमा घुमेर रहेको भीरकोट नपाको वडा नं – ७, पुतलीबजार नपाको वडा नं – १३ र १४ र आँधीखोला गापा – १ मा निशान प्रतिमालाई आलोपालो पूजा गर्ने प्रबन्ध मिलाइएको छ भने नौ वर्षमा सबै निशान पहिलाको ठाउँमा पुग्ने छन् ।
नव्रग्रह मन्दिर बनेको यस जल वराह धार्मिक वनभित्र ग्रह अनुसारका बिरुवा समेत रोपिएको छ ।
