खेतीपातीलाई आधुनिक बनाउने अभियानअन्तर्गत स्याङ्जाको भीरकोट नगरपालिकाले किसानलाई ५० प्रतिशत अनुदानमा कृषि औजार वितरण गरेको छ । यसबाट उत्पादन लागत घट्नुका साथै व्यवसायिक खेती विस्तारमा टेवा पुग्ने अपेक्षा गरिएको छ ।
नगरपालिकाले चालू आर्थिक वर्ष २०८२/८३ मा यान्त्रिकीकरण कार्यक्रममार्फत ५२ वटा हाते ट्याक्टर, ३२ वटा डिजेल इन्जिन, २० वटा पेट्रोल इन्जिन तथा १८ वटा कम्बाइन्ड मिल कृषकलाई हस्तान्तरण गरेको हो ।
अनुदानपछि कृषकले पेट्रोल इन्जिनसहितको हाते ट्याक्टर १९ हजार ५ सय रुपैयाँ, डिजेल इन्जिनसहितको हाते ट्याक्टर २६ हजार रुपैयाँ तथा कम्बाइन्ड मिल २० हजार रुपैयाँमा प्राप्त गरेका छन् ।
कृषि उत्पादन बढाउने र व्यवसायिक कृषिलाई प्रोत्साहन गर्ने उद्देश्यले मागका आधारमा औजार वितरण गरिएको नगरपालिकाका प्रमुख प्रशासकीय अधिकृत लक्ष्मण लम्सालले जानकारी दिए । आर्थिक वर्ष २०८२/८३ का लागि यान्त्रिकीकरण कार्यक्रमअन्तर्गत १५ लाख रुपैयाँ बजेट विनियोजन गरिएको थियो ।
औजार वितरण कार्यक्रममा नगर प्रमुख गोविन्दकुमार कर्माचार्यले किसानलाई प्राप्त सामग्रीको प्रभावकारी उपयोग गर्न आग्रह गर्दै आवश्यक पर्दा छिमेकी कृषकलाई समेत प्रयोगका लागि सहयोग गर्न सुझाव दिए । उनले वडाबाट संकलित माग र निवेदनका आधारमा औजार वितरण गरिएको बताए ।
भीरकोटमा पछिल्ला वर्षहरूमा कृषि क्षेत्रमा नयाँ अभ्यासहरू बढ्दै गएका छन् । व्यवसायिक तरभुजा खेतीको परीक्षण सफल भएको नगरपालिकाले जनाएको छ भने अकबरे खुर्सानी खेती पनि विस्तारको क्रममा छ ।
नगरपालिकाले तरकारी, दूध तथा मासु उत्पादनमा आत्मनिर्भरता हासिल गर्ने लक्ष्यसहित विभिन्न कार्यक्रम सञ्चालन गर्दै आएको छ । स्थानीय तहको यो पहलले कृषि पेशालाई थप आकर्षक र उत्पादनमुखी बनाउन मद्दत पुग्ने विश्वास गरिएको छ ।
