स्याङ्जाको गल्याङ नगरपालिकाले नगरभित्र अध्ययनरत १६७ जना विद्यार्थीलाई छात्रवृत्ति वितरण गरेको छ । आर्थिक अवस्था कमजोर भएका तथा अध्ययनमा उत्कृष्ट विद्यार्थीलाई लक्षित गर्दै नगरपालिकाले कक्षा ११–१२ र क्याम्पस तहका विद्यार्थीलाई छात्रवृत्ति उपलब्ध गराएको हो ।
नगरपालिकाका अनुसार सामुदायिक विद्यालयमा अध्ययनरत कक्षा ११–१२ का २० प्रतिशत र क्याम्पस तहका १० प्रतिशत विद्यार्थीलाई छात्रवृत्ति प्रदान गरिएको छ । छात्रवृत्ति रकम वार्षिक शुल्क बराबर उपलब्ध गराइएको जनाइएको छ ।
नगरपालिकाले आर्थिक अभावका कारण कुनै पनि विद्यार्थी शिक्षाबाट वञ्चित हुन नपरोस् भन्ने उद्देश्यसहित कार्यक्रम सञ्चालन गरेको जनाएको छ । यसले गरिब, विपन्न तथा जेहेन्दार विद्यार्थीलाई उच्च शिक्षातर्फ आकर्षित गर्नुका साथै सामुदायिक विद्यालय र क्याम्पसप्रति विद्यार्थी तथा अभिभावकको भरोसा बढाउने अपेक्षा गरिएको छ ।
नगरप्रमुख गुरुप्रसाद भट्टराईले आफू निर्वाचित भएपछि लिएको पहिलो निर्णयमध्ये शिक्षा क्षेत्रमा सहयोग गर्ने योजना पनि रहेको बताए । उनले वडा, विद्यालय र क्याम्पसको सिफारिसका आधारमा छात्रवृत्ति वितरण गरिएको जानकारी दिए ।
स्थानीयवासीले छात्रवृत्ति कार्यक्रमपछि आर्थिक समस्याका कारण पढाइ छोड्नुपर्ने अवस्था केही हदसम्म कम भएको बताएका छन् ।
