अवैध रूपमा नदिजन्य पदार्थ उत्खनन तथा ओसारपसार गर्दै गरेका तीन वटा ट्याक्टरलाई प्रहरीले नियन्त्रणमा लिएको छ ।
जिल्ला प्रहरी कार्यालय स्याङ्जा र प्रहरी चौकी दहथुमबाट खटिएको संयुक्त टोलीले विभिन्न स्थानमा चेकजाँचका क्रममा ती ट्याक्टरहरू फेला पारी आवश्यक अनुसन्धान र कानुनी कारबाहीका लागि सम्बन्धित स्थानीय तहमा बुझाएको प्रहरी निरीक्षक कमल नेपालीले जानकारी दिए ।
प्रहरी निरीक्षक नेपालीका अनुसार २०८२ साल मंसिर २ गते भीरकोट नगरपालिका–४ छ्याङछ्याङ्दीस्थित सिद्धार्थ राजमार्गमा चेकजाँच गर्दा लु ३ त ४९६० र ग १ त ४४८९ नम्बरका ट्याक्टरले बालुवा ओसारपसार गरिरहेको भेटिएको थियो । दुवै ट्याक्टरलाई नियन्त्रणमा लिई भीरकोट नगरपालिकाको कार्यालयमा पठाइएको र जनही १० हजार रुपैयाँ जरिवाना गरिएको छ ।
यसैगरी, मंसिर ३ गते आँधीखोला गाउँपालिका–५ सेतिदोभान गेट पुल नजिक चेकजाँचका क्रममा ग १ त ३१७८ नम्बरको ट्याक्टर ढुङ्गा ओसारपसार गर्दै गरेको अवस्थामा नियन्त्रणमा लिइएको छ । उक्त ट्याक्टरलाई अनुसन्धान तथा कानुनी कारबाहीका लागि आँधीखोला गाउँपालिकाको कार्यालयमा बुझाइएको र हाल कारबाही प्रक्रिया अगाडि बढाइएको प्रहरीले जनाएको छ ।
प्रहरीले अवैध उत्खनन र ओसारपसारका गतिविधिले वातावरण र सार्वजनिक पूर्वाधारमा असर पुर्याउने भन्दै यस्ता कार्यविरुद्ध निगरानी र कारबाहीलाई निरन्तरता दिइने जनाएको छ ।
