दार्चुलाको उत्तर हिमाली क्षेत्र र स्याङ्जाको मध्यपहाड जोड्नेगरी अपिहिमाल गाउँपालिका र अर्जुनचौपारी गाउँपालिकाबीच दीर्घकालीन सहकार्यको आधार बनाउने “भगिनी सम्बन्ध” सम्झौता गरिएको छ ।
दुवै पालिकाले पर्यटनदेखि शिक्षा, स्वास्थ्य, कृषि, वातावरणीय संरक्षण र सुशासनसम्मका क्षेत्रलाई समेट्दै पाँच वर्षे सहकार्य रोडम्याप अघि सारेका छन् ।
नेपाल सरकारको स्थानीय सरकार सञ्चालन ऐन २०७४ ले प्रोत्साहन गरेको अन्तर–पालिका सहकार्यलाई व्यवहारिक बनाउँदै दुर्गम हिमाली पर्यटन गन्तव्यको संभावनासहित अपिहिमाल क्षेत्र र सांस्कृतिक तथा धार्मिक आकर्षणहरूले भरिएको अर्जुनचौपारीबीच साझा पहलको मार्ग खुलेको हो ।
पर्यटन र संस्कृति मुख्य एजेन्डा
सम्झौताले दुवै पालिकाका विशिष्ट आकर्षणलाई राष्ट्रिय तथा अन्तर्राष्ट्रिय तहमा प्रवर्द्धन गर्ने लक्ष्य राखेको छ । अपिहिमाल बेसक्याम्प, कालीधुंगा, छिप्राटालजस्ता हाई अल्टिट्युड गन्तव्य तथा अर्जुनचौपारीको नवग्रह मन्दिर, डहरे देउराली र बोटानिकल म्याथमेटिकल पार्कलाई प्रचारप्रसार, संरक्षा र पूर्वाधार विकासका लागि संयुक्त रुपमा अघि बढाइनेछ ।
हिमाली ट्रेकिङ, सांस्कृतिक उत्सव, साहसिक पर्यटन र पर्यटक सुरक्षाका विषयमा दुवै पालिकाले साझा कार्यक्रम सञ्चालन गर्नेछन् ।
शिक्षा, युवा र डिजिटल कार्यक्रममा संयुक्त पहल
विद्यालय–विद्यालय साझेदारी, शिक्षक–विद्यार्थी आदानप्रदान, चेन्ज मेकर्स क्लब जस्ता युवा नेतृत्व परियोजनामा सहकार्य हुने सम्झौतामा उल्लेख छ । डिजिटल साक्षरता, ई–गभर्नेन्स, सीप विकास तथा उद्यमशीलता प्रवर्द्धनमा पनि संयुक्त कार्यक्रम अघि सारिनेछ ।
स्वास्थ्य, सामाजिक सुरक्षा र समावेशन
प्राथमिक स्वास्थ्य सेवा, जनस्वास्थ्य अभियान, महिला–बालबालिका–वृद्ध र विपन्न वर्गका लागि सशक्तिकरण कार्यक्रमलाई प्राथमिकता दिइनेछ । मानसिक स्वास्थ्य, पोषण र समुदाय–मुखी स्वास्थ्य प्रवर्द्धनमा अनुभव आदान–प्रदान गरिनेछ ।
कृषि, वातावरण र विपद् व्यवस्थापन
उच्च मूल्यका बाली, जैविक कृषि, पशुपालन र कृषि प्रविधिमा दुवै पालिकाले संयुक्त अध्ययन र तालिम कार्यक्रम सञ्चालन गर्नेछन् । जल–वन–माटो संरक्षण, जलवायु परिवर्तनको प्रभाव न्यूनीकरण र विपद् जोखिम कमीका क्षेत्रलाई प्रमुख सहकार्य क्षेत्रका रूपमा समेटिएको छ ।
पूर्वाधार र सुशासनमा साझेदारी
दुर्गम क्षेत्रका पूर्वाधार योजना, यातायात, सूचना तथा सञ्चार र सामुदायिक पूर्वाधार विकासमा अनुभव आदानप्रदान हुने उल्लेख छ । दुवै पालिकाले डिजिटल प्रशासन, पारदर्शिता र सुशासन सुधारका क्षेत्रमा पनि सहयोग गर्ने सहमति जनाएका छन् ।
दुवै पालिकाले “भगिनी सम्बन्ध समन्वय समिति” गठन गर्ने, वार्षिक कार्ययोजना बनाउने तथा प्रगति मूल्यांकन गर्ने व्यवस्था राखिएको छ । अध्ययन, अनुसन्धान, रिपोर्ट आदानप्रदान र प्राविधिक सहयोगमार्फत कार्यक्रम अघि बढाइनेछ ।
सम्झौता पाँच वर्षका लागि प्रभावकारी हुनेछ र आवश्यकताअनुसार नवीकरण गर्न सकिने छ । सम्झौतामा अपिहिमाल गाउँपालिकाका अध्यक्ष भक्त सिंह ठेकरे बोहरा र अर्जुनचौपारी गाउँपालिकाका अध्यक्ष प्रकाश तिवारीले हस्ताक्षर गरेका छन् ।
सम्झौतापछि अर्जुनचौपारी गाउँपालिकाका अध्यक्ष प्रकाश तिवारीले पालिकाले विकासका विभिन्न क्षेत्रमा तयार पारेका ‘सिग्नेचर मोडेल’ अन्य स्थानीय तहका लागि व्यवहारिक मार्गदर्शन बन्न सक्ने उल्लेख गरे ।
उनले अपिहिमालसँगको भगिनी सम्बन्धले दुवै पालिकाका नागरिकलाई सीप, अवसर र पहुँचमा नयाँ सम्भावना खोल्ने विश्वास व्यक्त गर्दै पर्यटन, शिक्षा, कृषि र सुशासनजस्ता क्षेत्रमा संयुक्त पहलले स्थानीय विकासलाई थप गति दिने बताए ।
