स्याङ्जामा चालू आर्थिक वर्ष २०८१/०८२ मा संघीय सरकारको बजेट ९६ प्रतिशत र प्रदेश सरकारको बजेट ८० प्रतिशत खर्च भएको छ । कोष तथा नियन्त्रक कार्यालय स्याङ्जाका प्रमुख थम नारायण शर्माका अनुसार संघ सरकारतर्फबाट प्राप्त जिल्लाको कुल बजेटको ९६ दशमलव २० प्रतिशत बजेट खर्च भएको हो ।
चालूतर्फ कुल आठ अर्ब छ करोड ५० लाख ७८ हजार दुई सय ९२ प्राप्त भएकोमा सात अर्ब ७८ करोड ११ लाख आठ हजार सात सय २४ रुपैयाँ ८४ पैसा खर्च भएको छ ।
पूँजीगततर्फ एक अर्ब १८ करोड २७ लाख चार हजार विनियोजित बजेटमध्ये ९१ करोड ६० लाख चार हजार चार सय ७१ रुपैयाँ ९७ पैसा खर्च भएको हो । संघीय सरकारको बजेटको चालूतर्फ ९६ दशमलव ४८ र पूँजीगततर्फ ७७ दशमलव ४५ प्रतिशत बजेट खर्च भएको हो । चालू र पूँजीगत गर्दा कुल ९६ दशमलव २० प्रतिशत खर्च भएको शर्माले जानकारी दिए ।
त्यस्तै, प्रदेश सरकारको चालू तर्फ ८२ करोड २२ लाख ५८ हजार छ सय ७७ मध्ये ६६ करोड ७९ लाख ४० हजार छ सय १४ रुपैयाँ ९५ पैसा अर्थात् ८१ दशमलव २३ प्रतिशत बजेट खर्च भएको छ । पूँजीगत खर्चतर्फ दुई अर्ब २५ करोड ४० लाख पचास हजार बजेट जिल्लाका लागि आएको भएपनि एक अर्ब ८० करोड ७७ लाख ५८ हजार आठ सय ८८ रुपैयाँ ४४ पैसा अर्थात् ८० दशमलव २० प्रतिशत बजेट खर्च भएको हो । प्रदेशतर्फको बजेट ८० दशमलव ४८ प्रतिशत खर्च भएको कोलेनिका प्रमुख शर्माले बताए ।
चालू आर्थिक वर्षमा जिल्लाका सरकारी कार्यालयहरुले झण्डै ८० करोड राजस्व संकलन गरेका छन् । संघीय कार्यालयहरुले ६० करोड ७२ लाख ९६ हजार नौ सय ३२ रुपैयाँ ६२ पैसा र प्रदेश कार्यालयहरुले १८ करोड ८९ लाख ७८ हजार सात सय ७७ रुपैयाँ ४५ पैसा राजस्व संकलन गरेका हुन् । संघ र प्रदेश सरकारतर्फका कार्यालयहरुले कुल ७९ करोड ६२ लाख ७५ हजार सात सय १० रुपैयाँ ०७ पैसा राजस्व संकलन गरेको कोष तथा नियन्त्रक कार्यालयले जनाएको छ ।
यसैगरी, कोष तथा नियन्त्रक कार्यालयका अनुसार प्रदेशको पूँजीगततर्फ कुल ४४ करोड ६२ लाख रुपैयाँ फ्रीज(फिर्ता) भएको छ । फिर्ता रकममध्ये सबैभन्दा धेरै पूर्वधार विकास कार्यालयको ३६ करोड ९० लाख, खानेपानी तथा सरसफाइ डिभिजन कार्यालयको दुई करोड ६२ लाख र जलस्रोत तथा सिंचाइ विकास डिभिजन कार्यालयको ६६ लाख रुपैयाँ रहेको छ ।
