नेसनल स्पोर्ट्स एकेडेमीको आयोजनामा ‘प्रचण्ड कप: राष्ट्रिय महिला भलिबल प्रतियोगिता -२०८२’ पोखरामा हुने भएको छ ।
यही जेठ २७ गतेदेखि ३१ गतेसम्म पोखरा रंगशालास्थित मल्टिपर्पोज कभर्डहलमा हुने प्रतियोगिताको सह-आयोजना अखिल नेपाल खेलकुद महासंघको रहनेछ । उक्त प्रतियोगितामा राष्ट्रिय स्तरका छ वटा प्रमुख टीम/क्लबको सहभागिता रहनेछ ।
नेपालका तीन विभागीय टोलीहरु त्रिभुवन आर्मी क्लब, नेपाल पुलिस क्लब र सशस्त्र प्रहरी बल नेपालको नेपाल एपीएफ क्लब, गण्डकी प्रदेश, न्यु डायमण्ड युथ स्पोर्ट्स क्लब र एभरेस्ट भलिबल क्लब प्रतियोगितामा सहभागी हुँदैछन् ।
प्रतियोगिताको विजेताले ६ लाख रुपैयाँ प्राप्त गर्नेछ भने उपविजेताले तीन लाख रुपैयाँ प्राप्त गर्ने नेसनल स्पोर्ट्स एकेडेमीका अध्यक्ष दीपक कोइरालाले जानकारी दिए ।
त्यस्तै, प्रतियोगितामा तेस्रो हुने टीम/क्लबले एक लाख रुपैयाँ प्राप्त गर्ने उनले बताए । प्रतियोगितामा सर्वोत्कृष्ट खेलाडीलाई तीस हजार रुपैयाँ र अन्य विधागततर्फका उत्कृष्ट खेलाडीहरुलाई जनही बीस हजार रुपैयाँ प्रदान गरिने अध्यक्ष कोइरालाले जानकारी दिए ।
प्रतियोगिता नेपाल भलिबल संघ र एभआइभिवीको नियमअनुसार राउन्ड रोबिन लिगका आधारमा खेलाइनेछ भने सहभागी टिममा विदेशी खेलाडीको हकमा ३ जनासम्म खेलाडी खेलाउन पाउने व्यवस्था गरिएको छ ।
‘भलिबललाई राष्ट्रिय खेल घोषणा गरेकाले यसै खेलको प्रतियोगिता आयोजना गरि खेलाडीहरुको क्षमता पहिचान र प्रवर्द्धनमा एक कोसेढुङ्गा बनाउने विश्वास लिएका छौं,’ कोइरालाले भने, ‘तत्कालीन प्रचण्ड सरकारले नै भलिबललाई राष्ट्रिय खेल घोषणा गरेको थियो । त्यसैले पनि भलिबलको विकास र व्यावसायिक उचाइमा पुर्याउने उद्देश्यले प्रचण्ड कप सुरु गरेका हौं ।’
नेपालको लोकप्रिय र गतिशील हुँदै गएको खेलको रूपमा रहेको भलिवल खेलको विकासमा एउटा इटा थप्ने प्रयास स्वरूप यो प्रतियोगिता आयोजना गर्न लागिएको अध्यक्ष कोइरालाले बताए । आगामी दिनमा यस प्रतियोगितालाई अझ उत्कृष्ट बनाउँदै लैजाने एकेडेमीले लक्ष्य लिएको बताउँदै फागुनसम्म पुरुष भलिबल प्रतियोगिता आयोजना गर्ने उनले उल्लेख गरे ।
त्यस्तै, प्रतियोगिताको सह-आयोजना रहेको अखिल नेपाल खेलकुद महासंघका अध्यक्ष शिव कोइरालाले वृहत् खेलकुद महोत्सव आयोजनाको तयारी गरिरहेको सुनाए ।
प्रतियोगितामा प्रदेश खेलकुद परिषद् गण्डकी र जिल्ला खेलकुद विकास कास्कीको विशेष सहयोग रहने बताइएको छ । एकेडेमीले पोखरामा बुधबार दिउँसो पत्रकार सम्मेलन गरी प्रतियोगिताबारे जानकारी गराएको हो ।
