स्याङ्जाको वालिङ् नगरपालिका – ९ मा रहेको वालिङ् बहुमुखी क्याम्पसको स्ववियु सभापतिमा नेविसंघका निरज श्रेष्ठ विजयी भएका छन् भने सचिवमा अनेरास्ववियुकी बिना रेग्मी विजयी भएकी छन् ।
मंगलबार सम्पन्न मतगणनामा नेविसंघका निरज श्रेष्ठ ३७७ मतका साथ स्ववियु सभापतिमा निर्वाचित भएका हुन् । श्रेष्ठले अनेरास्ववियुबाट सभापतिका उम्मेदवार बनेका विष्णु पङ्गेनीलाई पराजित गरेका थिए । पङ्गेनीले ३४२ मत प्राप्त गरेका थिए ।
अनेरास्ववियुबाट सचिवका उम्मेदवार बिना रेग्मीले नेविसंघबाट उम्मेदवार बनेकी ममता रेग्मीलाई पराजित गर्दै निर्वाचित भएकी हुन् । बिना ३६६ मतसहित निर्वाचित भएकी हुन् भने ममताले ३४२ मत प्राप्त गरेकी थिइन् ।
त्यस्तै, कोषाध्यक्षमा नेविसंघका विवेक कुँवरले अनेरास्ववियुका भुम बहादुर राना (किस्मत)लाई पराजित गर्दै विजयी भएका छन् । कुँवरले ४०६ र रानाले २९२ मत ल्याएका थिए ।
त्यस्तै, सदस्यमा नेविसंघका उम्मेदवार पुजा कोइराला ४०३, नम्रता पौडेल ३९५, पवित्रा विक ३९८, प्रवेश पौड्याल ४२२, दिपा कुमारी आले ३९३ र याम प्रसाद पङ्गेनी (सन्दिप) ४२४ मतसहित निर्वाचित भएका हुन् ।
अनेरास्ववियुबाट सदस्य पदका उम्मेदवार कविता रानाले ३०३, सफल लुइँटेलले ३१८, भीमप्रसाद डुम्रेले २९९, अमन परियारले २८१, सुरक्षा खत्रीले ३०४ र स्नेहा एसकेले २७८ मत ल्याएका थिए ।
स्ववियु निर्वाचनमा अनेरास्ववियु र नेपाल विद्यार्थी संघ दुवै आफ्नो प्यानलसहित निर्वाचनमा उत्रेको थियो ।
नौ सय ९४ मतदाता रहेको वालिङ् बहुमुखी क्याम्पसमा ७२८ मत खसेको निर्वाचन समितिले जनाएको छ ।
