तपाईंले हेक्का राख्नुभएकै होला, सामान्य दिनमा भन्दा बढी खानेकुरा खाइन्छ दशैंमा । दशैंको खानेकुरामा मासुजन्य परिकार धेरै हुने गर्छ । पाहुना निम्त्याएर भोज ख्वाउँदा होस् वा इष्टमित्रकहाँ पाहुना लाग्दा, केही न केही त खानैपर्छ ।
नातागोता, इष्टमित्र सबैकहाँ पुग्नैपर्ने, पुगेपछि केही न केही खानैपर्ने अवस्था हुन्छ यसबेला । त्यसैले चाहेर पनि यसबेला हामी आफ्नो मुख बार्न सक्दैनौं । ‘जे आउँछ, मज्जाले पचाउँछ’ शैलीमा आँखा चिम्लेर खाइदिन्छौं ।
अर्कोतिर दशैंको रमझममा भुलेर व्यायम गरिदैन । शारीरिक श्रम पनि गरिदैन । सुत्ने, उठ्ने तालिका पनि त्यती मिल्दैन । यसको नतिजा के हुन्छ ? स्वभाविक रुपमा शारीरिक तौल बढ्छ ।
तपाईं/हामीलाई थाहै छ, तौल बढ्नु स्वास्थ्यका दृष्टिले त्यती फाइदाजनक मानिदैन । यसले अनेक रोगलाई जन्म दिन्छ । त्यसैले हामी सकेसम्म आफ्नो तौल नियन्त्रणमा राख्न चाहन्छौं । तर, कसरी ? यसका निम्ति एउटा काइदाको उपाय छ ।
कसरी रहने फिट एन्ड फाइन ?
शरीरको तौल कम गर्न त्यति गाह्रो पनि छैन । यो त केवल आफ्नो इच्छाशक्तिमा भर पर्ने कुरा हो कि आˆनो शरीरलाई कति फिट राख्ने हो ? शरीरलाई फिट राख्न तथा शरीरको तौल कम गर्न सकारात्मक सोच राखेर हामीले आफैलाई प्रोत्साहित गर्नुपर्छ ।
– दशैंमा पाहुना लाग्दा होस् वा आफ्नै घरमा मिठोमसिना खाएको बेला, सुरुमै मानसिक तयारी गरौं कि, आज सही र सन्तुलित खानेकुरा मात्र सेवन गर्छु ।
– दशैंमा थरीथरी खानेकुरा बनाइन्छ । त्यसमा माछामासुदेखि हरियो सागपात, सलादसम्म हुन्छ । आफ्नो प्लेटमा राखिएको खानेकुरामध्ये सलाद, सागपातमा जोड दिनुपर्छ ।
– माछामासु वा अन्य परिकार खाँदै नखाने भने होइन, तर हरियो सलादले पेट भरेपछि अन्य खानेकुराले पेट ओगट्न पाउँदैन ।
– पेट चर्कनेगरी खाना खाइएको छ भने केही क्षण विश्राम गरेर पिंग खेल्ने वा अन्य शारीरिक गतिविधि गर्ने ।
– संभव भएसम्म सुत्ने र उठ्ने तालिकालाई नियमित गर्ने । ९-१० बजेभित्र सुत्ने र विहान ५ बजेअघि नै उठ्ने अभ्यास गर्ने । यसले पनि हामी अनियनित्रत खानेकुराबाट बच्न सक्छौं । रातभर बसेर खाना खाइरहँदा स्वास्थ्यमा समस्या आउन सक्छ ।
– एकसाथ धेरैथरी परिकार सेवन नगरौं । बरु धेरै पटक खाने, तर थोरै थोरै ।
– मदिरा सेवन गर्नुअघि जुस, पानी पर्याप्त मात्रामा सेवन गरौं, यसले गर्दा शरीरमा मदिराको असर कम हुन्छ ।
– मदिरासँग माछामासु सेवन गर्नु राम्रो होइन । बरु सलाद वा फलफूलसँग सेवन गर्न सकिन्छ ।
– तारेको, भुटेको, धेरै मसलेदार खानेकुरामाथि नियन्त्रण गरौं ।
– एकै स्थानमा लामो समय बस्ने, तास खेल्ने, टिभी हेर्ने भन्दा पनि उठ्ने, हिँड्ने, यताउता गर्ने, खेल्ने काममा आफुलाई व्यस्त बनाऔं ।
