गण्डकी प्रदेशमा डेंगी संक्रमणको दर फेरि चुलिएको छ । प्रदेश स्वास्थ्य मन्त्रालयका तथ्याङ्कअनुसार गत पुसयता हालसम्म ८११ जनामा डेंगी पुष्टि भएको छ । पछिल्ला तीन सातामात्रै २०२ नयाँ संक्रमित थपिएका छन् ।
सबैभन्दा बढी संक्रमित कास्कीमा देखिएका छन् । कास्कीमा ४४१ जनामा संक्रमण पुष्टि भएको छ भने तनहुँमा १२०, लमजुङमा ९३, गोरखामा ५८, बागलुङ र स्याङ्जामा ३२–३२, पर्वतमा २०, म्याग्दीमा १०, नवलपुरमा ४ र मुस्ताङमा १ जनामा डेंगी देखिएको छ । मनाङमा भने अहिलेसम्म एक जनामासमेत संक्रमण भेटिएको छैन ।
संक्रमितमध्ये आधाभन्दा बढी बिरामी पोखराका हुन् । पोखरामा मात्र ४३२ जनामा डेंगी देखिएको छ । पछिल्ला तीन सातामा पोखरामै १२९ जना थपिएका छन् । गत वर्ष पोखरा डेंगीको ‘हटस्पट’ बनेको थियो । त्यो समयमा ८ हजार ६ सयभन्दा बढीमा संक्रमण फैलिँदा तीन जनाको ज्यान गएको थियो ।
स्वास्थ्यकर्मीहरूले साउनदेखि कात्तिकसम्म संक्रमणको दर अझै बढ्ने अनुमान गरेका छन् । जोखिम बढ्दै जाँदा स्वास्थ्य मन्त्रालयसहित स्थानीय तहहरू सचेतनात्मक अभियानमा सक्रिय भएका छन् ।
संक्रमण फैलिन नदिन घर, कार्यालय र सार्वजनिक स्थलमा थुप्रिएको पानी हटाउने, पुराना टायर, ड्रम, भाँडाकुँडा जस्ता ठाउँमा पानी जम्मा हुन नदिने, भेटिए नष्ट गर्ने स्वास्थ्यकर्मीको सुझाव छ । डेंगी एडिस एजिप्टाइ जातको पोथी लामखुट्टेको टोकाइबाट फैलिने भएकाले लामखुट्टे प्रजननस्थल नष्ट गर्नु प्रभावकारी उपाय मानिन्छ ।
