पोखरा । नेपालको अग्रणी डेरी उद्योग सुजल डेरी प्रालिले पोखराको पर्यटकीय केन्द्र लेकसाइडस्थित बाराही चोकमा ‘लभबर्ड्स प्रिमियम आइसक्रिम’को पार्लर सञ्चालनमा ल्याएको छ।
नयाँ पार्लरको उद्घाटन लक्ष्मी ग्रुपका कार्यकारी निर्देशक सुनिल श्रेष्ठको प्रमुख आतिथ्यमा आयोजित समारोहका बीच सम्पन्न भएको थियो। कार्यक्रममा स्थानीय विशिष्ट व्यक्तित्व, पर्यटन व्यवसायी, च्यानल पार्टनर तथा आइसक्रिमप्रेमीहरूको सहभागिता रहेको थियो। नयाँ पार्लरको सञ्चालनले पोखरामा गुणस्तरीय स्थानीय डेरी उत्पादनको प्रवर्द्धनसँगै रोजगारी सिर्जना र स्थानीय पर्यटनमा योगदान पुर्याउने विश्वास लिइएको छ।
सोमबारबाट औपचारिक रूपमा सञ्चालनमा आएको उक्त नयाँ पार्लरलाई आधुनिक, आरामदायी तथा परिवारमैत्री वातावरणमा तयार पारिएको कम्पनीले जनाएको छ।
दशकौँदेखि डेरी उद्योगमा हासिल गरेको अनुभव, गुणस्तरप्रतिको प्रतिबद्धता, मापदण्डमा आधारित उत्पादन प्रणाली तथा स्थानीय दुग्ध किसानसँगको सहकार्यलाई उपभोक्ताकेन्द्रित प्रिमियम रिटेल व्यवसायमा विस्तार गर्ने उद्देश्यसहित पार्लर अघि बढाइएको हो।
लभबर्ड्सले उत्कृष्ट सामाग्री प्रयोग गरी नवीनता, फरक स्वाद र उपभोक्ता अनुभवलाई ध्यानमा राख्दै सबै उमेर समूहका लागि आइसक्रिमलाई तीन श्रेणीमा विभाजन गरेको छ। जसअन्तर्गत क्लासिक फ्लेभर्सको सानो स्कुपलाई १५० रुपैयाँ र रेगुलर स्कुपलाई २३० रुपैयाँ तोकिएको छ। यस्तै प्रिमियम फ्लेभर्सको सानो स्कुप १७५ रुपैयाँ र रेगुलर २५५ रुपैयाँ तथा एक्जोटिक फ्लेभर्सको सानो स्कुप २२५ रुपैयाँ र रेगुलर स्कुपलाई ३१० रुपैयाँ पर्नेछ।
उच्च गुणस्तर र विविध स्वादका साथ लभबर्ड्सले प्रिमियम आइसक्रिम अनुभवलाई उपभोक्ताका लागि पहुँचयोग्य बनाउने आफ्नो प्रतिबद्धतालाई निरन्तरता दिएको छ।
‘पोखराका उपभोक्तालाई विश्वस्तरीय आइसक्रिमको अनुभव उपलब्ध गराउनु हाम्रो उद्देश्य हो, तर त्यसका लागि महँगो मूल्य तिर्नुपर्ने अवस्था नहोस् भन्नेमा हामी सचेत छौँ,’ लभबर्ड्सका एक आधिकारिक प्रतिनिधिले भने, ‘उत्कृष्ट स्वाद र खुसीको एक स्कुप हरेकका लागि पहुँचयोग्य हुनुपर्छ भन्ने हाम्रो विश्वास हो।’
लेकसाइड घुम्न आउने स्थानीय तथा पर्यटक दुवैलाई लक्षित गर्दै पार्लरमा आरामदायी खानपिन (डाइन-इन) सुविधा तथा छिटो लैजान सकिने (टेक-अवे) सेवाको व्यवस्था गरिएको छ। बिहान १० बजेदेखि बेलुका ११ बजेसम्म खुल्ने नयाँ पार्लरलाई साथीभाइ तथा परिवारसँग समय बिताउन र रमाइलो गर्नका लागि उपयुक्त गन्तव्यका रूपमा विकास गरिएको छ।
बाराही चोकस्थित नयाँ पार्लर लभबर्ड्सको नेपालमा चौथो र पोखरामा दोस्रो आउटलेट हो। यसअघि काठमाडौँको नक्साल, पोखराको चिप्लेढुंगा र काठमाडौँको महाराजगञ्जमा यसका आउटलेटहरू सञ्चालनमा आइसकेका छन्। आगामी दिनमा देशभर नै रिटेल उपस्थिति विस्तार गर्ने योजना रहेको सुजल डेरीले जनाएको छ।
