भौगोलिक रूपमा सदरमुकामदेखि टाढा रहेको पश्चिम स्याङ्जाको कालीगण्डकी गाउँपालिका–७ मा निर्माणाधीन अस्पतालको काम सुस्त गतिमा अघि बढ्दा स्थानीयवासी निराश बनेका छन् ।
संघीय सरकार र गाउँपालिकाको साझेदारीमा करिब २२ करोड रुपैयाँ लागतमा निर्माण भइरहेको कालीगण्डकी अस्पताल निर्धारित समयमा सम्पन्न हुन नसक्दा स्थानीयले सहज स्वास्थ्य सेवा पाउन अझै पर्खनुपर्ने भएको छ ।
२०७९ सालमा दुई वर्षभित्र निर्माण सम्पन्न गर्ने लक्ष्यसहित आर एन्ड सी एस–बेकन जेभीले अस्पताल भवन निर्माणको जिम्मा लिएको थियो । तर सम्झौताअनुसारको अवधि सकिइसक्दा पनि निर्माण सम्पन्न हुन सकेको छैन ।
निर्माण कम्पनीका इन्जिनियर राहुल बैद्यका अनुसार पछिल्लो समय वैदेशिक रोजगारीका कारण स्थानीयस्तरमा दक्ष जनशक्तिको अभाव हुँदा निर्माण कार्य प्रभावित भएको छ । कामदार व्यवस्थापनमा देखिएको समस्याका कारण निर्माणले अपेक्षित गति लिन नसकेको उनको भनाइ छ ।
नयाँ अस्पताल निर्माण सम्पन्न भएपछि स्याङ्जाका साथै छिमेकी जिल्ला गुल्मी र पर्वतका नागरिकले समेत स्वास्थ्य सेवा पाउने अपेक्षा गरिएको छ । हाल भने अस्पतालले सानो र साँघुरो भवनबाट सेवा दिँदै आएको छ ।
स्थानीयवासीले करोडौं रुपैयाँ लगानी भएर पनि अस्पताल भवन निर्माणमा ढिलाइ हुँदा चिन्ता बढेको बताएका छन् । गाउँमै भरपर्दो स्वास्थ्य सेवा उपलब्ध हुने अपेक्षासहित सुरु गरिएको आयोजना समयमै सम्पन्न नहुँदा उपचारका लागि बाहिर जानुपर्ने बाध्यता कायमै रहने उनीहरूको भनाइ छ ।
अस्पताल निर्माणका क्रममा करिब १२ घरधुरीको जग्गा तथा संरचना प्रभावित भएको विषय पनि निर्माणको चुनौती बनेको छ । जग्गासम्बन्धी समस्या र अन्य अवरोधका कारण कामले अपेक्षित गति लिन नसकेको बताइएको छ ।
कालीगण्डकी गाउँपालिका–७ का वडा अध्यक्ष उमप्रसाद भट्टराईले नागरिकलाई स्थानीयस्तरमै स्वास्थ्य सेवा उपलब्ध गराउने उद्देश्यले अस्पताल निर्माण थालिए पनि विभिन्न कारणले काममा ढिलाइ भइरहेको बताए ।
उनले जग्गासम्बन्धी विवादलगायत निर्माणका क्रममा देखिएका समस्या समाधान गरेर कामलाई गति दिनुपर्ने आवश्यकता रहेको बताए । गाउँमै गुणस्तरीय स्वास्थ्य सेवा उपलब्ध भए पाल्पा, पोखरा तथा अन्य सहरमा उपचारका लागि धाउनुपर्ने बाध्यता कम हुने उनको भनाइ छ ।
निर्माणाधीन अस्पतालको काम समयमै पूरा गर्न नसके करोडौं रुपैयाँको लगानी र स्थानीयको अपेक्षा दुवै प्रभावित हुने देखिन्छ । नयाँ भवन सम्पन्न भएपछि पुरानो र साँघुरो संरचनाबाट सञ्चालन भइरहेको अस्पताललाई नयाँ भवनमा स्थानान्तरण गरी थप सहज र गुणस्तरीय स्वास्थ्य सेवा दिन सकिनेछ ।
त्यसका लागि जग्गासम्बन्धी विवाद र निर्माणमा देखिएका अन्य समस्या तत्काल समाधान गरी अस्पताल निर्माणलाई समयमै सम्पन्न गर्न सम्बन्धित निकायले प्रभावकारी पहल गर्नुपर्ने स्थानीयको माग छ ।
