गण्डकी र लुम्बिनी दुई प्रदेशका स्याङ्जाको चापाकोट नगरपालिका–८ दामाचौर र पाल्पाको रामपुर नगरपालिका–६ जोड्ने कालीगण्डकी नदीमाथिको मोटरेबल ट्रस पुल निर्माण सम्पन्न भएको छ । तीन वर्षभित्र सक्ने लक्ष्यका साथ सुरु गरिएको आयोजना विभिन्न प्राविधिक समस्याका कारण १५ वर्षपछि पूरा भएको हो ।
सडक डिभिजन कार्यालय पाल्पाका अनुसार २०६८ असार २६ गते एमएस इलाइट एसबिए जेभी, कपन काठमाडौंसँग १५ करोड ६८ लाख १३ हजार २६६ रुपैयाँमा पुल निर्माणको सम्झौता भएको थियो । तीन स्पानमा निर्माण गरिएको पुल १८१.६९ मिटर लामो र ११ मिटर चौडा रहेको छ ।
सुरुमा वेल फाउन्डेसन डिजाइनअनुसार निर्माण थालिएको थियो । नदीका दुवै किनारमा पिल्लर निर्माण सम्पन्न भए पनि बीच भागमा पिल्लर निर्माणका क्रममा समस्या देखिएपछि काम रोकिएको थियो ।
डिजाइनअनुसार १५–१५ मिटर गहिराइसम्म वेल फाउन्डेसन पुर्याउनुपर्ने भए पनि करिब पाँच मिटरमै चट्टान भेटिएपछि सोही डिजाइनअनुसार निर्माण सम्भव नभएको भन्दै निर्माण कम्पनीले काम स्थगित गरेको थियो ।
पछि पुल महाशाखाले २०७८ सालमा पुरानो डिजाइन परिवर्तन गर्दै वेल फाउन्डेसनको सट्टा पाइल फाउन्डेसनमा पुल निर्माण गर्ने निर्णय गरेको थियो । नयाँ डिजाइन स्वीकृत भएपछि निर्माणको जिम्मेवारी पुनः सोही निर्माण कम्पनीलाई दिइएको र त्यसपछि मात्रै निर्माण कार्यले गति लिएको हो ।
सडक डिभिजन कार्यालय पाल्पाका निमित्त प्रमुख पवित्रमणि आचार्यका अनुसार निर्माण कम्पनीले आठौँ पटक थपिएको म्याद साउन ३० गतेसम्म पाएको भए पनि पुलको निर्माण कार्य अहिले नै सम्पन्न भइसकेको छ ।
उनका अनुसार डिजाइन परिवर्तन गर्नुपर्दा आयोजनाको लागत २२.०५ प्रतिशतले बढेको छ । तीन वर्षमा सम्पन्न गर्ने लक्ष्य राखिएको पुल १५ वर्षमा सकिँदा भ्याटसहित कुल लागत २१ करोड ६२ लाख ६१ हजार ३६८ रुपैयाँ पुगेको छ ।
निर्माण कम्पनीका प्रतिनिधि श्याम केसीले प्रारम्भिक डिजाइन असफल हुँदा लामो समय आयोजना रोकिएको र त्यसबाट कम्पनीले करिब सात करोड रुपैयाँ बराबरको क्षति व्यहोर्नुपरेको दाबी गरे ।
पुल सञ्चालनमा आएपछि स्याङ्जा र पाल्पाबीचको आवागमन सहज हुने विश्वास गरिएको छ । साथै भारतबाट ज्याग्दी खोला करिडोर हुँदै आँधीखोला करिडोर, पर्वत र मुक्तिनाथसम्म पुग्ने मार्गलाई थप सहज बनाउने तथा उत्तरतर्फ चीनसँगको सम्पर्क विस्तारमा समेत यो पुल महत्त्वपूर्ण पूर्वाधारका रूपमा रहने अपेक्षा गरिएको छ ।
