४८औँ पुष्पलाल स्मृति दिवसको अवसरमा राष्ट्रिय युवा संघ नेपाल, जिल्ला कमिटी स्याङ्जाले आयोजना गरेको वृहत् रक्तदान कार्यक्रममा ८२ जनाले रक्तदान गरेका छन् । ‘रक्तदान, जीवनदान’ भन्ने सन्देशसहित पुतलीबजारमा आयोजित कार्यक्रममा ८२ पिन्ट रगत संकलन भएको हो ।
रक्तदान कार्यक्रमको उद्घाटन आँधीखोला गाउँपालिकाका अध्यक्ष विश्व पौडेलले रक्तदान गरेर गरेका थिए । कार्यक्रममा महिला र पुरुष गरी ८२ जना रक्तदाताले स्वेच्छिक रूपमा रक्तदान गरेका थिए ।
राष्ट्रिय युवा संघ नेपालका केन्द्रीय उपाध्यक्ष विनय शाहको प्रमुख आतिथ्यतामा सम्पन्न कार्यक्रममा नेकपा एमालेका विभिन्न तहका नेता–कार्यकर्ता, राष्ट्रिय युवा संघका पदाधिकारी तथा सदस्य र सर्वसाधारणको सहभागिता रहेको थियो ।
कार्यक्रमलाई सम्बोधन गर्दै केन्द्रीय उपाध्यक्ष शाहले पुष्पलाल श्रेष्ठको स्मृति दिवसलाई युवा संघले केवल औपचारिक कार्यक्रममा सीमित नराखी समाजसेवासँग जोड्दै आएको बताए । रक्तदानजस्ता मानवीय अभियानलाई संघले निरन्तरता दिँदै आएको उल्लेख गर्दै उनले रगतको अभावमा कुनै पनि बिरामीले उपचारबाट वञ्चित हुन नपरोस् भन्ने उद्देश्यले यस्ता कार्यक्रम सञ्चालन गरिँदै आएको बताए ।
‘रक्तदानले प्रत्यक्ष रूपमा कसैको जीवन बचाउन सक्छ,’ उनले भने, ‘त्यसैले युवाहरू सामाजिक उत्तरदायित्वका यस्ता अभियानमा अझ सक्रिय भएर सहभागी हुन आवश्यक छ ।’
शाहले समाज परिवर्तनमा युवाशक्तिको भूमिका महत्वपूर्ण हुने उल्लेख गर्दै पुष्पलाल श्रेष्ठले अघि सारेका विचार र सामाजिक उत्तरदायित्वको भावनालाई व्यवहारमा उतार्नुपर्ने धारणा राखे । उनले आगामी दिनमा पनि सामाजिक सेवामूलक कार्यक्रमलाई निरन्तरता दिने प्रतिबद्धता व्यक्त गरे ।
रक्तदानमा सहभागीहरूले पनि रगत दान गर्नु केवल व्यक्तिगत सहयोग नभई मानवीय जीवन बचाउने अभियान भएको बताए । आफूले दिएको रगतले कुनै बिरामीको जीवन जोगाउन सक्ने विश्वासका साथ नियमित रूपमा रक्तदान अभियानलाई विस्तार गर्नुपर्ने उनीहरूको भनाइ थियो ।
कार्यक्रममा संकलन गरिएको रगत जिल्ला अस्पतालको ब्लड बैंकमा भण्डारण गरिने आयोजकले जनाएको छ । रक्तदान कार्यक्रम सञ्चालनका लागि नेपाल रेडक्रस सोसाइटी, स्याङ्जा जिल्ला शाखाले प्राविधिक सहयोग गरेको थियो ।
पुष्पलाल स्मृति दिवसको अवसरमा आयोजना गरिएको रक्तदान कार्यक्रमले युवाहरू सामाजिक सेवामा सक्रिय रहेको सन्देश दिएको आयोजकको भनाइ छ ।
