स्याङ्जामा विपद्सम्बन्धी सूचना आदान–प्रदानलाई छिटो, प्रभावकारी र सर्वसुलभ बनाउन जिल्ला प्रशासन कार्यालयले नयाँ टोल–फ्री नम्बर सञ्चालनमा ल्याएको छ ।
जिल्ला आपत्कालीन कार्य सञ्चालन केन्द्रमार्फत सञ्चालन हुँदै आएको विपद् कल सेन्टरको पुरानो टोल–फ्री नम्बर ११४९ परिवर्तन गरी अब १२३४ नम्बर सञ्चालनमा ल्याइएको जिल्ला प्रशासन कार्यालय स्याङ्जाले जनाएको छ ।
नयाँ नम्बर नागरिकले सहज रूपमा सम्झिन सक्ने र विपद्का बेला तत्काल सूचना दिन सक्ने उद्देश्यले सञ्चालनमा ल्याइएको सहायक प्रमुख जिल्ला अधिकारी प्रेम सुवेदीले बताए ।
उनका अनुसार जिल्ला आपत्कालीन कार्य सञ्चालन केन्द्रमा रहेको विपद् कल सेन्टर २४सै घण्टा खुला रहनेछ । बाढी, पहिरो, भूकम्प, आगलागी, चट्याङ, शीतलहरलगायत प्राकृतिक तथा गैरप्राकृतिक विपद्का घटनाबारे जानकारी दिन, समस्या वा गुनासो राख्न तथा आवश्यक सुझाव दिन नागरिकले टोल–फ्री नम्बर १२३४ मा सम्पर्क गर्न सक्नेछन् । यस नम्बरमा फोन गर्दा कुनै शुल्क नलाग्ने प्रशासनले जनाएको छ ।
सहायक प्रमुख जिल्ला अधिकारी सुवेदीले विपद्को पूर्वतयारी, उद्धार तथा समन्वयलाई अझ प्रभावकारी बनाउन नयाँ हटलाइन उपयोगी हुने विश्वास व्यक्त गरे ।
‘छिटो खबर गरौं, सुरक्षित रहौं’ भन्ने अभियानलाई व्यवहारमा उतार्न पनि यो सेवाले महत्वपूर्ण भूमिका खेल्ने अपेक्षा गरिएको उनले बताए ।
जिल्ला प्रशासन कार्यालयले विपद्को समयमा अफवाहभन्दा आधिकारिक सूचना आदान–प्रदान गर्न र आकस्मिक अवस्थाबारे तत्काल जानकारी गराउन नागरिकलाई नयाँ टोल–फ्री नम्बर १२३४ प्रयोग गर्न आग्रह गरेको छ ।
