स्याङ्जाको अर्जुनचौपारी गाउँपालिकामा कार्यरत एक कर्मचारीविरुद्ध नक्कली शैक्षिक प्रमाणपत्र प्रयोग गरेको आरोपमा विशेष अदालत काठमाडौंमा भ्रस्टाचार मुद्दा दायर भएको छ ।
अख्तियार दुरुपयोग अनुसन्धान आयोगले गाउँपालिकाको वन, वातावरण तथा विपद् शाखामा सहायक पाँचौं तहमा कार्यरत हिरालाल काफ्लेविरुद्ध बिहीबार मुद्दा दायर गरेको हो ।
आयोगले काफ्लेले भारतको आसामस्थित शैक्षिक संस्थाको झुट्टा प्रमाणपत्र पेस गरेर नियुक्ति, पदोन्नति तथा तहवृद्धिसमेत लिएको निष्कर्ष निकाल्दै विशेष अदालतमा आरोपपत्र दायर गरेको जनाएको छ ।
आयोगका अनुसार काफ्लेले नियुक्ति र पदोन्नतिको क्रममा भारतको आसाम प्रदेशको गुहाटीस्थित बोर्ड अफ सेकेन्डरी एजुकेसन, आसामबाट सन् १९९८ मा एसएलसी सरहको एचएसएलसी (रिपिटर्स) परीक्षा उत्तीर्ण गरेको भनी नक्कली शैक्षिक प्रमाणपत्र पेस गरेका थिए ।
उक्त प्रमाणपत्रका आधारमा उनले आफूले पाउन नसक्ने सरकारी पद, सुविधा र लाभ लिएको आयोगको दाबी छ । उनले सहायक पाँचौं तहमा नियुक्ति तथा पछि पदोन्नतिको लाभ लिएको आयोगको आरोपपत्रमा उल्लेख छ ।
आयोगमा परेको उजुरीमा काफ्लेले अध्ययन नै नगरी भारतबाट नक्कली शैक्षिक प्रमाणपत्र ल्याई त्यसकै आधारमा अर्जुनचौपारी गाउँपालिकाको वडा सचिव बनेको भन्दै छानबिनको माग गरिएको थियो । अनुसन्धानका क्रममा उक्त आरोप पुष्टि भएको आयोगले जनाएको छ ।
आरोपपत्रअनुसार काफ्ले पहिलोपटक २०५७ साल जेठ २ गते तत्कालीन अर्जुनचौपारी गाउँ विकास समितिमा कार्यालय सहायक (राजपत्र अङ्कित, तृतीय) पदमा अस्थायी रूपमा नियुक्त भएका थिए । त्यसपछि २०६४ साउन ६ गते कार्यालय सहायक (खरिदार) पदमा पुनः अस्थायी नियुक्ति पाए ।
त्यसैगरी, २०६७ कात्तिक १५ गते सहायकस्तर तेस्रो तहको कार्यालय सहायक (मुखिया) पदमा स्थायी नियुक्ति भएका काफ्ले २०७२ माघ १ गते सहायकस्तर चौथो तह (खरिदार) मा बढुवा भएका थिए । पछि २०७९ माघ १० गते गाउँ कार्यपालिकाको कार्यालय अर्जुनचौपारीमा सहायकस्तर पाँचौं तहमा तहवृद्धि भएको आयोगले जनाएको छ ।
यी सबै नियुक्ति, बढुवा र तहवृद्धिका क्रममा उनले सोही नक्कली शैक्षिक प्रमाणपत्र प्रयोग गरेको अख्तियारको आरोप छ ।
आयोगले नक्कली शैक्षिक प्रमाणपत्र प्रयोग गरेर सार्वजनिक पद हासिल गरेको आरोपमा काफ्लेविरुद्ध विशेष अदालत काठमाडौंमा भ्रष्टाचारसम्बन्धी मुद्दा दायर गरेको जनाएको छ ।
मुद्दामाथिको सुनुवाइपछि अदालतको निर्णयअनुसार थप कानुनी प्रक्रिया अघि बढ्नेछ ।
