बाँझो जमिन बढ्दै जानु, जंगली जनावरको त्रास र परम्परागत खेतीबाट किसानको मोह घट्दै गएको अवस्थामा स्याङ्जाको भीरकोट नगरपालिकाले अकबरे खुर्सानी खेतीलाई वैकल्पिक आम्दानीको आधार बनाउन थालेको छ ।
नगरपालिकाले सञ्चालन गरेको खेती प्रवर्द्धन कार्यक्रमअन्तर्गत नौवटै वडामा सामूहिक नर्सरी स्थापना गरेर अकबरे खुर्सानीको व्यावसायिक खेती विस्तार गरिएको हो । पालिकाका अनुसार २६ वटा नर्सरीबाट करिब एक लाख चार सय बिरुवा उत्पादन गरी २७० किसानलाई वितरण गरिएको छ । ती बिरुवाबाट झन्डै १२५ रोपनी क्षेत्रफलमा खेती विस्तार भएको जनाइएको छ ।
नगरपालिकाले यो कार्यक्रमलाई केवल बिरुवा वितरणमा सीमित नराखी किसानलाई आवश्यक प्राविधिक सहयोगसमेत उपलब्ध गराउँदै आएको छ । अभिमुखीकरण, समूह गठन, बीउ व्यवस्थापन, रोग तथा किराको नियन्त्रण, जैविक विषादी निर्माण र झोलमल बनाउने तालिमसमेत सञ्चालन गरिएको प्रमुख प्रशासकीय अधिकृत लक्ष्मण लम्सालले जानकारी दिए ।
उनका अनुसार उत्पादनशील जमिन उपयोगविहीन हुने, रासायनिक मल तथा विषादीको प्रयोग बढ्दै जाने र खेतीप्रतिको आकर्षण घट्ने समस्यालाई ध्यानमा राखेर अकबरे खुर्सानीलाई प्राथमिकतामा राखिएको हो । यसबाट किसानलाई कम क्षेत्रफलबाट पनि राम्रो आम्दानी लिन सकिने अपेक्षा गरिएको छ ।
एक रोपनीभन्दा बढी क्षेत्रफलमा अकबरे खुर्सानी लगाउने किसानलाई हेफर प्रोजेक्ट नेपाल परियोजनाअन्तर्गत मल्चिङ प्लास्टिकसमेत सहयोग गरिएको नगरपालिकाले जनाएको छ ।
स्थानीयको बुझाइमा कृषि क्षेत्रमा देखिएका चुनौतीलाई अवसरमा बदल्न यस्ता कार्यक्रमले सकारात्मक प्रभाव पार्न थालेका छन् । स्थानीय तह, विकास साझेदार संस्था र किसानबीचको सहकार्यले बाँझो जमिनको उपयोगसँगै रोजगारी र आयआर्जन बढाउने लक्ष्यलाई थप बल पुग्ने विश्वास नगर कार्यपालिका सदस्य एवं भीरकोट–७ का वडा अध्यक्ष ताराप्रसाद अर्यालले व्यक्त गरे ।
