स्याङ्जाको भीरकोट नगरपालिका–७ स्थित ऐतिहासिक खिलुङ कालिका मन्दिर जोड्ने सडक स्तरोन्नति भएपछि स्थानीय बासिन्दा र पर्यटकलाई आवतजावतमा सहज भएको छ । सिद्धार्थ राजमार्गको हेलुदेखि खिलुङ गाउँसम्म पुग्ने सडक दुई दशकभन्दा बढी समयपछि कालोपत्रे र ढलान गरिएको हो ।
वि.सं. २०६२ सालमै ट्र्याक खुलेको उक्त सडक लामो समयसम्म कच्ची र जोखिमपूर्ण अवस्थामा थियो । अहिले सडकको २ किलोमिटर भाग ढलान र ५ सय मिटर कालोपत्रे गरिएको छ । विशेषगरी जोखिमपूर्ण मानिने ‘भीरखण्ड’ क्षेत्रमा सडक सुधार भएपछि स्थानीयले राहत महसुस गरेका छन् ।
स्थानीय ज्येष्ठ नागरिक चन्द्रबहादुर गुरुङले सडक स्तरोन्नतिसँगै मन्दिर दर्शन गर्न आउने भक्तजन र गाउँलेलाई ठूलो सहजता भएको बताए । “पहिले यात्रा निकै जोखिमपूर्ण थियो, अहिले धेरै सहज भएको छ,” उनले भने ।
हेलुदेखि खिलुङ गाउँसम्मको सडक करिब ७ किलोमिटर लामो छ । समुद्री सतहबाट करिब १६ सय मिटर उचाइमा रहेको गाउँ र मन्दिर जोड्ने सडकको थप २.५ किलोमिटर खण्डमा पनि स्तरोन्नतिको काम जारी छ ।
संघीयता कार्यान्वयनपछि स्थानीय, प्रदेश र संघीय सरकारको प्राथमिकतामा परेको यो सडक करिब १३ करोड रुपैयाँ लागतमा निर्माण सम्पन्न गरिएको हो । फुर्सामाटा कालिका कन्ट्रक्सन र अर्जुनचौपारी/भुषाल कन्ट्रक्सनले निर्माणको जिम्मा लिएका थिए ।
वडा अध्यक्ष तारा प्रसाद अर्यालका अनुसार सडक सुधारसँगै धार्मिक पर्यटन मात्रै होइन, स्थानीय कृषि उत्पादनको बजार पहुँच पनि बढ्ने अपेक्षा गरिएको छ । खिलुङ क्षेत्रमा उत्पादन हुने सुन्तला तथा अर्गानिक कृषि उपज अब सहज रूपमा बजारसम्म पुर्याउन सकिने उनले बताए ।
“पहिले हेलुदेखि खिलुङ पुग्नै एक घण्टा लाग्थ्यो, त्यो पनि निकै कष्टकर यात्रा थियो,” अध्यक्ष अर्यालले भने, “अब भने आधा घण्टामै सहज रूपमा पुग्न सकिन्छ ।”
