स्याङ्जाको अर्जुनचौपारी गाउँपालिकाले पछिल्ला चार वर्षमा शैक्षिक क्षेत्रमा उल्लेखनीय सुधार हासिल गरेको छ । गाउँपालिकाले सार्वजनिक गरेको तथ्यांकअनुसार शैक्षिक सत्र २०७९ देखि २०८२ सम्मको अवधिमा आधारभूत तहको नतिजा उल्टिने गरी सुधार देखिएको हो ।
२०७९ सालमा आधारभूत तहमा जम्मा १८ प्रतिशत विद्यार्थी मात्रै ग्रेडेड भएका थिए भने ८२ प्रतिशत विद्यार्थी नन–ग्रेडेड थिए । तर २०८२ सालको वार्षिक परीक्षामा भने ९२ प्रतिशत विद्यार्थी ग्रेडेड भएका छन् भने ८ प्रतिशत मात्रै नन–ग्रेडेड रहेका छन् ।
उच्च जिपिए ल्याउने विद्यार्थीको संख्यामा पनि उल्लेखनीय वृद्धि भएको गाउँपालिकाले जनाएको छ । २०७९ मा सीमित विद्यार्थीले मात्र ३.० जिपिए ल्याएका थिए । २०८१ मा यो संख्या करिब ६० प्रतिशत पुगेको थियो भने २०८२ मा ९० प्रतिशत विद्यार्थीले ३.० भन्दा माथि जिपिए ल्याएका छन् ।
कक्षागत नतिजामा समेत सुधार देखिएको छ । कक्षा ३ मा २०७९ सालमा २४.३९ प्रतिशत विद्यार्थी मात्रै ग्रेडेड भएका थिए । तर २०८२ मा परीक्षामा सहभागी सबै १ सय ३४ विद्यार्थी ग्रेडेड भएका छन् ।
शिक्षालाई उच्च प्राथमिकतामा राखेर योजना अनुसार काम गर्दा नतिजा सुधार भएको हो । शिक्षक, अभिभावक, विद्यार्थी र स्थानीय सरकारबीच साझा जिम्मेवारीको भावना विकास गरिएकाले सकारात्मक परिणाम आएको हो ।
– प्रकाश तिवारी
अध्यक्ष, अर्जुनचौपारी गाउँपालिका
कक्षा ५ मा २०७९ मा १७.१२ प्रतिशत विद्यार्थी मात्रै ग्रेडेड भएका थिए भने २०८२ मा यो संख्या ८७.३४ प्रतिशत पुगेको छ । सो वर्ष १ सय ५८ विद्यार्थीमध्ये १ सय ३८ जना ग्रेडेड भएका थिए ।
कक्षा ८ मा पनि उल्लेखनीय सुधार देखिएको छ । २०७९ मा १२.८३ प्रतिशत विद्यार्थी मात्रै ग्रेडेड भएका थिए भने २०८२ मा ९१.०१ प्रतिशत विद्यार्थी ग्रेडेड भएका छन् । परीक्षामा सहभागी १ सय ७८ जनामध्ये १ सय ६२ जना सफल भएका छन् ।
समग्रमा कक्षा ३, ५ र ८ मा सहभागी ४ सय ७० विद्यार्थीमध्ये ४ सय ३४ जना ग्रेडेड भएका छन्, जुन ९२.३४ प्रतिशत हो ।
गाउँपालिका अध्यक्ष प्रकाश तिवारीले शिक्षालाई उच्च प्राथमिकतामा राखेर योजना अनुसार काम गर्दा नतिजा सुधार भएको बताए । उनले शिक्षक, अभिभावक, विद्यार्थी र स्थानीय सरकारबीच साझा जिम्मेवारीको भावना विकास गरिएकाले सकारात्मक परिणाम आएको बताए ।
उनका अनुसार शिक्षक तालिम, नियमित अनुगमन, अतिरिक्त कक्षा, स्वास्थ्य शिविर, चेन्ज मेकर क्लब तथा संस्कार शिक्षा कार्यक्रमले पनि नतिजा सुधारमा टेवा पुगेको छ ।
यस्तै, शिक्षा शाखा प्रमुख कमला चापागाईंले शिक्षकहरूको सक्रियता नै सफलताको मुख्य आधार भएको बताइन् । गाउँपालिका र रूम टु रिडको सहकार्यमा सञ्चालन गरिएको साक्षरता कक्षाले विद्यार्थीको पठन सीप बढाउन सहयोग पुगेको उनको भनाइ छ ।
गाउँ शिक्षा समितिका सदस्य तथा घण्टे माध्यमिक विद्यालयका प्रधानाध्यापक विष्णु चापागाईंले परीक्षा प्रणाली सुधार, विषयगत जिम्मेवारी, अतिरिक्त कक्षा र केन्द्रगत परीक्षा सञ्चालनले नतिजा सुधारमा सहयोग पुगेको बताए ।
शिक्षकहरूको सक्रियता नै सफलताको मुख्य आधार हो । गाउँपालिका र रूम टु रिडको सहकार्यमा सञ्चालन गरिएको साक्षरता कक्षाले विद्यार्थीको पठन सीप बढाउन सहयोग पुगेको छ ।
– कमला चापागाईं
शिक्षा शाखा प्रमुख, अर्जुनचौपारी गाउँपालिका
पञ्चकन्या माध्यमिक विद्यालयका अभिभावक प्रेम ढकालले सामुदायिक विद्यालयको गुणस्तर बढेसँगै संस्थागत विद्यालयबाट समेत विद्यार्थी भर्ना हुन थालेको बताए ।
अर्जुनचौपारी गाउँपालिकाले छोटो अवधिमै शिक्षा क्षेत्रमा देखाएको प्रगति सकारात्मक मानिए पनि यसलाई दिगो बनाउन निरन्तर लगानी, अनुगमन र प्रभावकारी कार्यान्वयन आवश्यक देखिएको छ ।
