सूचना प्रविधि (आईटी) र व्यवसायिक क्षेत्रमा सक्रिय रहँदै आएका स्याङ्जाका युवा झबिलाल डुम्रे प्रतिनिधिसभामा निर्वाचित भएका छन् । फागुन २१ गते सम्पन्न प्रतिनिधिसभा सदस्य निर्वाचनमा स्याङ्जा क्षेत्र नम्बर–२ बाट राष्ट्रिय स्वतन्त्र पार्टी (रास्वपा)का उम्मेदवारका रूपमा प्रतिस्पर्धा गरेका डुम्रे फराकिलो मतान्तरसहित विजयी भएका हुन् ।
स्याङ्जा निर्वाचन क्षेत्र नम्बर–२ का निर्वाचन अधिकृत ऋषि पौडेलका अनुसार डुम्रेले २५ हजार ३५४ मत प्राप्त गर्दै नेपाली कांग्रेसका उम्मेदवार भागवतप्रकाश मल्ललाई ४ हजार ५२४ मतले पराजित गरेका हुन् । मल्लले २० हजार ८३० मत प्राप्त गर्दै उपविजेता बने । यस्तै, नेकपा (एमाले)का उम्मेदवार खिमबहादुर थापाले १४ हजार १०८ मत ल्याउँदै तेस्रो स्थान हासिल गरे ।
अन्य उम्मेदवारमध्ये नेपाल कम्युनिष्ट पार्टीका पदमबहादुर विकले ८४८ र राष्ट्रिय प्रजातन्त्र पार्टीका रविन पाठकले ५६६ मत प्राप्त गरेका छन् । यस क्षेत्रमा दुई स्वतन्त्रसहित १० राजनीतिक दलका गरी १२ जना उम्मेदवार चुनावी मैदानमा थिए ।
निर्वाचन कार्यालय स्याङ्जाका अनुसार स्याङ्जा–२ मा कुल १ लाख १७ हजार ९३० मतदाता रहेका थिए । तीमध्ये ६४ हजार ९२८ मत खसेको थियो । खसेको मतमध्ये ६२ हजार २६६ मत सदर हुँदा २ हजार ६६२ मत बदर भएको जनाइएको छ ।
यो निर्वाचन क्षेत्रमा कालीगण्डकी गाउँपालिका, चापाकोट नगरपालिका, भीरकोट नगरपालिकाका वडा नम्बर ५ देखि ९ सम्म तथा वालिङ नगरपालिकाका वडा नम्बर ३ र ४ बाहेकका अन्य १२ वडाका मतदाताले मतदान गरेका थिए ।
राजनीतिक रूपमा अपेक्षाकृत नयाँ अनुहार मानिने डुम्रे सामाजिक र संगठनात्मक गतिविधिमा भने लामो समयदेखि सक्रिय छन् । राष्ट्रिय स्वतन्त्र पार्टी स्थापना भएपछि संगठन विस्तारमा सक्रिय भूमिका खेलेका उनी पार्टीका संस्थापक सदस्यसमेत हुन् ।
वालिङ नगरपालिका–१४ छोरेखर्कमा २०४९ साल साउन ५ गते जन्मिएका डुम्रेले स्नातकोत्तर तहसम्म अध्ययन गरेका छन् । व्यवसायिक क्षेत्रमा सक्रिय उनी आफ्ना उद्योग तथा फ्याक्ट्रीमार्फत करिब दुई सय जनालाई प्रत्यक्ष रोजगारी प्रदान गर्दै आएका छन् । पछिल्ला वर्षहरूमा पोखरालाई कर्मथलो बनाएर व्यवसाय र सामाजिक कार्यमा सक्रिय रहँदै आएका उनी अहिले संसद् यात्रा तय गर्न सफल भएका हुन् ।
रास्वपा गण्डकी प्रदेशका पूर्व इन्चार्जसमेत रहेका डुम्रे हाल पार्टीको संगठन विभागमा जिम्मेवारी सम्हालिरहेका छन् । चुनावी अभियानका क्रममा उनले रोजगारी सिर्जना, उद्यमशीलताको विकास, भ्रष्टाचार नियन्त्रण, सुशासन स्थापना तथा स्याङ्जामा कृषि, पर्यटन र उद्योगको सम्भावना उपयोग गर्ने एजेन्डा अघि सारेका थिए ।
‘स्याङ्जा–२ को विकासलाई केन्द्रमा राखेर अघि बढ्नेछु,’ डुम्रेले भने, ‘रोजगारी सिर्जना, उद्यमशीलता प्रवर्द्धन, कृषि आधुनिकीकरण, पर्यटन विकास र सुशासन स्थापनामा मेरो ध्यान केन्द्रित हुनेछ ।’ स्थानीय उत्पादनलाई बजारसँग जोड्ने, उद्योग तथा लगानी भित्र्याउने र विकासका योजनामा पारदर्शिता कायम गर्ने उनको प्रतिबद्धता छ ।
डुम्रेको जितसँगै कांग्रेसको प्रभाव क्षेत्र मानिने स्याङ्जा–२ मा नयाँ राजनीतिक समीकरण देखिएको विश्लेषण गरिएको छ । यसअघि सो क्षेत्रबाट कांग्रेसका पूर्वउपसभापति धनराज गुरुङ निर्वाचित भएका थिए । २०७४ सालको निर्वाचनमा भने एमालेकी सचिव पद्मा अर्याल विजयी भएकी थिइन् ।
यसपटक भने उद्यमी पृष्ठभूमिबाट राजनीतिमा आएका डुम्रे पहिलो प्रयासमै संसद् प्रवेश गर्न सफल भएका छन् । उनको जितलाई स्याङ्जामा नयाँ पुस्ताको नेतृत्व उदाएको संकेतका रूपमा पनि हेरिएको छ ।
