प्रतिनिधि सभा सदस्य निर्वाचनलाई शान्तिपूर्ण र व्यवस्थित रूपमा सम्पन्न गराउन खटिएका निर्वाचन प्रहरीलाई स्याङ्जामा सम्मानसहित बिदाइ गरिएको छ । निर्वाचन सुरक्षामा योगदान दिएका प्रहरीहरूलाई बिहीबार प्रशंसापत्र प्रदान गर्दै औपचारिक रूपमा बिदाइ गरिएको हो ।
जिल्ला प्रहरी कार्यालय स्याङ्जा, वडा प्रहरी कार्यालय वालिङ, इलाका प्रहरी कार्यालय चापाकोट र इलाका प्रहरी कार्यालय चिसापानीमा छुट्टाछुट्टै कार्यक्रम आयोजना गरी उनीहरूलाई बिदाइ गरिएको स्याङ्जाका प्रहरी प्रमुख प्रहरी उपरीक्षक दधिराम न्यौपानेले जानकारी दिए ।
निर्वाचन सुरक्षामा खटिएका प्रहरीहरूलाई बुधबार सूचना जारी गरेर बिदाइ कार्यक्रममा उपस्थित हुन भनिएको थियो । सोही अनुरूप आयोजित कार्यक्रममा अधिकांश प्रहरी पोशाकमै उपस्थित भई सम्मान ग्रहण गरेका थिए । कार्यक्रममा उनीहरूलाई निर्वाचन अवधिमा निर्वाह गरेको भूमिकाको कदर गर्दै प्रशंसापत्र वितरण गरिएको थियो ।
निर्वाचन सुरक्षाका लागि स्याङ्जामा कुल २ हजार १ सय १५ जना निर्वाचन प्रहरी परिचालन गरिएको थियो । जिल्लाभित्र उपलब्ध जनशक्तिसँगै बाहिरी जिल्लाबाट समेत प्रहरी ल्याइएको थियो । जसअन्तर्गत तनहुँबाट ६७, कास्कीबाट १ सय ३९ र नवलपरासीबाट २ सय ९० जना प्रहरी स्याङ्जामा खटिएका थिए भने जिल्लाभित्रबाट १ हजार ६ सय १९ जना छनोट गरिएको थियो ।
निर्वाचन अवधिभर ती प्रहरीहरू विभिन्न मतदान केन्द्र र संवेदनशील स्थानमा खटिएर सुरक्षा व्यवस्थापनमा सक्रिय बनेका थिए । निर्वाचनलाई शान्तिपूर्ण बनाउन योगदान दिएका प्रहरीलाई सम्मानपूर्वक बिदाइ गरिएको जिल्ला प्रहरी कार्यालय स्याङ्जाले जनाएको छ ।
