जिल्ला प्रहरी कार्यालय र जिल्ला ट्राफिक प्रहरी कार्यालय स्याङ्जाबाट खटिएको संयुक्त चेकिङ टोलीले पुतलीबजारमा अवैध रूपमा ढुवानी गरिएको ठूलो परिमाणको मासु बरामद गरेको छ ।
सोमबार दिउँसो वालिङबाट पोखरातर्फ आउँदै गरेको एक पिकअप गाडी चेकजाँच गर्ने क्रममा कूल बक्समा नराखी तथा आवश्यक कागजातबिनै मासु बोकेको अवस्थामा फेला परेको सूचना अधिकारी प्रहरी नायब उपरीक्षक प्रसन्न राज चौधरीले जानकारी दिए ।
पुतलीबजार नगरपालिका–१ स्थित बसपार्कमा गरिएको चेकजाँचका क्रममा गाडीभित्रबाट करिब ४९५ केजी तौल बराबरको १८० पिस मासु बरामद गरिएको डिएसपी चौधरीले बताए । उनका अनुसार उक्त ग २ च १६७८ नम्बरको पिकअप गाडीका चालक वालिङ नगरपालिका–९ का २१ वर्षीय सन्दिप सार्कीलाई सवारीसाधनसहित नियन्त्रणमा लिइएको छ ।
बरामद मासु र चालकलाई आवश्यक अनुसन्धान तथा कानुनी कारबाहीका लागि पुतलीबजार नगरपालिकाको कार्यालयमा पठाइएको जिल्ला प्रहरी कार्यालय स्याङ्जाले जनाएको छ । अवैध रूपमा खाद्य वस्तु ढुवानी गर्ने कार्यविरुद्ध नियमित निगरानी र चेकजाँचलाई थप कडाइ गरिएको डिएसपी चौधरीले बताए ।
