स्याङ्जाको बिरुवा गाउँपालिका–२ झागडीमा प्रहरीले विशेष सर्च अप्रेसनका क्रममा अवैध भरुवा बन्दुक र विस्फोटक सामग्रीसहित दुई जनालाई नियन्त्रणमा लिएको छ ।
प्रतिनिधि सभा निर्वाचन २०८२ को सुरक्षालाई ध्यानमा राख्दै जिल्ला प्रहरी कार्यालय स्याङ्जा र प्रहरी चौकी बिरुवा अर्चलेबाट खटिएको संयुक्त टोलीले लुकाइछिपाइ राखिएको अवस्थामा स्थानीय ६६ वर्षीय रोमबहादुर राना र ६९ वर्षीय वीरबहादुर थापालाई पक्राउ गरेको हो ।
प्रहरीका अनुसार रानाले घर नजिकै सामुदायिक जङ्गलको ओडारमा लुकाइराखेको फलामको गजसहितका दुई थान एकनाले भरुवा बन्दुक, ४८० ग्राम बारूद, १३५ थान छर्रा, फलामका चिम्टा, छुच्ची, सोडा, डेटोनेटर, सेफ्टी फ्युज, गन्धक, प्लास्टिक एक्सप्लोसिभ किरकी, गोली तथा खोका, केप र बाघको दाह्राजस्तै देखिने एक थान नुकिलो वस्तु बरामद गरिएको छ ।
यस्तै, थापाको घर नजिकै झाडीबाट फलामको गजसहित एक थान एकनाले भरुवा बन्दुक फेला परेको प्रहरी नायब उपरीक्षक प्रसान्तराज चौधरीले जानकारी दिए ।
पक्राउ परेका दुवै जनालाई बरामद हतियार र सामग्रीसहित आवश्यक अनुसन्धानका लागि हिरासतमा राखी कानुनी प्रक्रिया अगाडि बढाइएको प्रहरीले जनाएको छ ।
