स्याङ्जाको पुतलीबजार नगरपालिका–१ मालेबगर खेलमैदानमा जारी प्रथम खुमा अर्याल कप टी–२० क्रिकेट लिग रनिङ शिल्ड प्रतियोगिताको सेमिफाइनल समीकरण पूरा भएको छ । आइतबार सम्पन्न खेलहरूमा हरिनास गाउँपालिका र चापाकोट नगरपालिका विजयी भएसँगै अन्तिम चारमा पुग्ने टिमको टुंगो लागेको हो ।
खुमा अर्याल फाउण्डेसन स्याङ्जाको आयोजनामा भइरहेको प्रतियोगिताअन्तर्गत समूह ‘डी’ को खेलमा टस जितेर पहिले ब्याटिङ गरेको अर्जुनचौपारी गाउँपालिकाले १९.४ ओभरमा सबै विकेट गुमाउँदै ९८ रन मात्र बनाएको थियो । सेमिफाइनल प्रवेशका लागि हरिनासलाई ११.४ ओभरभित्र लक्ष्य भेट्टाउनुपर्ने दबाब थियो । हरिनासले १०.१ ओभरमै दुई विकेटको क्षतिमा १०२ रन जोड्दै लक्ष्य सहजै पार गरेको थियो ।
हरिनासको जितमा दिवस कुँवरले ३५ रन बनाए भने अविजित ३४ रनको योगदान दिएका मिलन क्षेत्रीले तीन विकेट पनि लिएका थिए । यही खेलमा उत्कृष्ट प्रदर्शन गरेका मिलन क्षेत्री ‘प्लेयर अफ द म्याच’ बन्दै पाँच हजार रुपैयाँसहित ट्रफी हात पारेका छन् ।
त्यसैगरी, समूह ‘ए’ को खेलमा चापाकोटले बिरुवा गाउँपालिकामाथि विशाल जित निकालेको छ । टस जितेर पहिले ब्याटिङ गरेको चापाकोटले निर्धारित ओभरमा पाँच विकेटको क्षतिमा २४३ रनको योगफल तयार गरेको थियो । चापाकोटका लागि विशाल कोईरालाले ९७, आशिष ताम्राकारले ४९, करण पंगेनीले ४३ तथा अपराजित पौडेलले ३५ रन बनाएका थिए । बिरुवाका स्वप्निल लम्सालले तीन र भीमबहादुर गुरुङले दुई विकेट लिएका थिए ।
२४४ रनको लक्ष्य पछ्याएको बिरुवा ९.२ ओभरमै सबै विकेट गुमाउँदै जम्मा १९ रनमै समेटिएको थियो । बिरुवाका खेलाडीमध्ये नौ रन मात्र ब्याटबाट आएका थिए । चापाकोटका समिर पंगेनीले चार विकेट लिए भने नारायण भट्टराई र रोहित सिंह दर्जीले दुई–दुई विकेट हात पारेका थिए । यस खेलका ‘प्लेयर अफ द म्याच’ विशाल कोईराला घोषित हुँदै पाँच हजार रुपैयाँसहित ट्रफी पाएका छन् ।
अब सेमिफाइनलमा सोमबार समूह ‘बी’ को विजेता वालिङ नगरपालिका र समूह ‘डी’ को विजेता हरिनास गाउँपालिकाबीच प्रतिस्पर्धा हुनेछ भने अर्को सेमिफाइनलमा समूह ‘ए’ को विजेता चापाकोट नगरपालिका र समूह ‘सी’ को विजेता गल्याङ नगरपालिका आमनेसामने हुनेछन् । प्रतियोगितामा जिल्लाका ११ वटै पालिकाको सहभागिता रहेको छ ।
स्वास्थ्य, शिक्षा, खेलकुद र रोजगारी क्षेत्रमा सहयोग गर्ने उद्देश्यले स्थापना भएको खुमा अर्याल फाउण्डेसनले स्याङ्जालाई क्रिकेटसहितका खेलकुदको केन्द्रका रूपमा विकास गर्ने लक्ष्य लिएको फाउण्डेसनका अध्यक्ष लेखनाथ शर्माले बताए ।
प्रतियोगिताको विजेताले दुई लाख रुपैयाँसहित कप, मेडल र प्रमाणपत्र प्राप्त गर्नेछ । उपविजेताले एक लाख ५० हजार रुपैयाँसहित ट्रफी, मेडल र प्रमाणपत्र पाउनेछ । तृतीय हुने टिमले एक लाख र सान्त्वना टिमले ५० हजार रुपैयाँसहित ट्रफी, मेडल र प्रमाणपत्र प्राप्त गर्नेछन् ।
लगातार तीन वर्ष उपाधि जित्ने पालिकाले विशेष रनिङ शिल्ड हात पार्ने व्यवस्था गरिएको छ । साथै प्रत्येक खेलको ‘प्लेयर अफ दि म्याच’लाई पाँच हजार र विधागत उत्कृष्ट खेलाडीलाई जनही १० हजार रुपैयाँ पुरस्कार प्रदान गरिने फाउन्डेसनले जनाएको छ ।
