महाकवि लक्ष्मीप्रसाद देवकोटाको ११७औँ जन्मजयन्तीको अवसरमा पहिलोपटक स्याङ्जामा आयोजित ‘देवकोटा साहित्य उत्सव–२०८२’ सम्पन्न भएको छ ।
स्याङ्जा साहित्य प्रतिष्ठान र कालिका पुस्तकालयको संयुक्त आयोजनामा तथा भीरकोट नगरपालिका –७ वडा कार्यालयको सहयोगमा शनिबार सम्पन्न उत्सवमा स्याङ्जाभरका समकालीन साहित्यकारहरूले आफ्नो रचना प्रस्तुत गरेका थिए ।
कार्यक्रममा मुक्तककार विष्णु पङ्गेनी पाण्डे, पारिश्वर न्यौपाने, विक्रम संवत, मुनाल गोदार र शोभाकान्त रेग्मीले मुक्तक वाचन गरेका थिए भने गजलकार लक्ष्मी काफ्ले, दिलीप तिवारी, खगेन्द्रजंग थापा, कृष्ण खड्का, नारायण न्यौपाने र झवनाथ बस्यालले गजल सुनाएका थिए ।
त्यस्तै, कविहरु चिन्तु गिरी, अग्निकुमार रेग्मी पल्लव, अनन्त अर्याल, दुर्गाबहादुर रोकाहा शालिकराम लम्साल, चण्डिकाप्रसाद भट्टराई, लोकहरि पाण्डेय क्षितिज, ध्रुवप्रसाद शर्मा पङ्गेनी, यमप्रकाश खनाल, हरिप्रसाद पङ्गेनी, ढालबहादुर के.सी., राजेन्द्रकुमार श्रेष्ठ, इन्द्रप्रसाद पाठक, कमला अधिकारी सिग्देल, प्रेमबन्धु सुवेदी, प्रकाश न्यौपाने चौरासपति, राजु गैह्रे, शम्भु अर्याल, स्मारिका अर्याल, गोविन्दशरण रेग्मी, सुबोध रेग्मी, हिमाङ्शु अर्याल र हिमालयजङ्ग बानियाँले कविता वाचन गरेका थिए ।
वडाध्यक्ष ताराप्रसाद अर्यालले उत्सव उद्घाटन गर्दै देवकोटाको साहित्यिक गौरवलाई स्मरणीय बनाउने उद्देश्यका साथ कार्यक्रमले ऐतिहासिक रूप लिन सक्षम भएको बताए । उनले आगामी दिनमा पनि वडाको तर्फबाट यस्ता कार्यक्रमलाई निरन्तर सहयोग रहने प्रतिबद्धता समेत व्यक्त गरे ।
स्याङ्जा साहित्य प्रतिष्ठानका अध्यक्ष कुमार रानाले स्याङ्जालाई साहित्यिक पहिचान बनाउन निरन्तर अभियान अघि बढिरहेको बताए । कालिका पुस्तकालयका अध्यक्ष श्यामप्रसाद अर्यालले समुदायस्तरमा हुँदै आएको साहित्यिक गतिविधिले स्याङ्जाको सिर्जनशील उचाइ थपिएको उल्लेख गरेका थिए ।
कार्यक्रमको संयोजन युवा साहित्यिक अभियन्ता मिलन समीरले गरेका थिए । साथै, कालिका पुस्तकालयको लागि समीरले २० हजार रुपैयाँ बराबरका पुस्तक उपहारस्वरूप हस्तान्तरण गरेका थिए ।
