पालिका स्तरीय पुरुष भलिबल प्रतियोगितालो उपाधि पुतलीबजार नगरपालिकाले हात पारेको छ ।
स्याङ्जाको भीरकोट नगरपालिका -१ सिसौघारी खेलमैदानमा बयरघारी पिस युथ क्लबले असोज २३ गतेदेखि आयोजना गरेको चौथो बयरघारी रमाइलो मेलामा मुख्य आकर्षण बनेको यस प्रतियोगिताको फाइनल खेलमा पुतलीबजारले भीरकोट नगरपालिकालाई ३-२ को सेटमा पराजित गर्दै उपाधि जितेको हो ।
रमाइलो मेलाको अन्तिम दिन आइतबार सम्पन्न फाइनल खेलमा पुतलीबजारले पहिलो सेट २५-२०, दोस्रो सेट २१-२५, तेस्रो सेट २५-२०, चौथो सेट २४-२६ र अन्तिम पाँचौं सेट १५-१२ ले जित्दै उपाधि हासिल गरेको हो ।
विजेता पुतलीबजार नगरपालिकाले नगद एक लाख १५ हजार रुपैयाँसहित ट्रफी, मेडल र प्रमाणपत्र प्राप्त गरेको छ । उपविजेता भीरकोट नगरपालिकाले नगद ७० हजार रुपैयाँसहित ट्रफी, मेडल र प्रमाणपत्रमा चित्त बुझाएको छ ।
त्यस्तै, तेस्रो स्थानको लागि भएको खेलमा वालिङ् नगरपालिकाले बिरुवा गाउँपालिकालाई ३-१ को सेटमा हराउँदै जित हासिल गरेको छ । पहिलो सेट १८-२५ ले गुमाएको वालिङ्ले लगातार दोस्रो सेट २५-१५, तेस्रो सेट २५-२० र चौथो सेट २५-१७ को अङ्कले आफ्नो पोल्टामा पार्दै जितेको थियो ।
तेस्रो स्थान हासिल गरेको वालिङ्ले नगद ४० हजार रुपैयाँ र सान्त्वना भएको बिरुवाले नगद ३० हजार रुपैयाँसहित ट्रफी, मेडल र प्रमाणपत्र पाएका छन् । उनीहरुलाई सबैलाई भीरकोट नगरपालिकाका प्रमुख गोविन्द कुमार कर्माचार्यले पुरस्कार प्रदान गरेका थिए ।
प्रतियोगितामा पुतलीबजार नगरपालिकाका दर्शन गुरुङ सर्वोत्कृष्ट खेलाडी बनेका छन् । यस्तै, पुतलीबजारकै लेशन गुरुङ उत्कृष्ट ब्लकर, विवश खड्का उत्कृष्ट सेटर र सन्तोष राना उत्कृष्ट प्रशिक्षक, भीरकोट नगरपालिकाका सुशील खड्का उत्कृष्ट स्पाइकर, जीत बहादुर सार्की उत्कृष्ट लिब्रो, वालिङ् नगरपालिकाका ठग बहादुर गुरुङ उत्कृष्ट सर्वर र बिरुवा गाउँपालिकाका लभसन सुनार उदयमान खेलाडी घोषित भएका छन् ।
विधागततर्फका सबैलाई ट्रफी, मेडल र प्रमाणपत्र प्रदान गरिएको क्लबका अध्यक्ष रोशन गुरुङले जानकारी दिए ।
चार–चार पालिकालाई दुई समूहमा विभाजन गरी लिग प्रणालीमा खेल सञ्चालन गरिएको प्रतियोगितामा अर्जुनचौपारी, बिरुवा, पुतलीबजार, भीरकोट, वालिङ र तनहुँको शुक्लागण्डकी लगायतका टोलीहरूको सहभागिता रहेको थियो ।
