स्याङ्जा जिल्लाको भीरकोट नगरपालिका –६ भण्डारखोलास्थित खिलुङदेउराली स्वास्थ्य चौकी २६ वर्षपछि मर्मत सम्भार भई अस्पताल जस्तै सुन्दर र सुविधासम्पन्न बनेको छ ।
विसं. २०४४ सालमा स्थापना भई २०५६ सालमा चार कोठे नयाँ भवन निर्माण भएको यो चौकी वर्षौंसम्म बेवास्ता भई जीर्ण अवस्थामा स्वास्थ्य सेवा दिन बाध्य थियो । टिनको पुरानो छाना चुहिने, पर्खाल चिरा पर्ने र रंग उडेका कारण यस स्वास्थ्य केन्द्र जोखिम मोलेर सेवा दिने थलोमा परिणत भएको थियो ।
तर, अहिले स्वास्थ्य चौकीले रूप फेरेको छ । संघीय सरकारअन्तर्गत स्वास्थ्य मन्त्रालयको बजेट सहयोगमा भवन पहिलोपटक मर्मत गरिएको वडा अध्यक्ष लक्ष्मण खत्री क्षेत्रीले जानकारी दिए । करिब ३३ लाख ६६ हजार रुपैयाँ खर्चमा उपभोक्ता समितिमार्फत भएको मर्मतले अब यहाँका बासिन्दाले अस्पताल जस्तै वातावरणमा सेवा पाउने भएका छन् ।
उक्त भवनमा पुराना छ वटा कोठासहित अहिले पाँच नयाँ कोठा थपिएका छन् । सबै कोठामा टायल बिछ्याइएको छ भने पुराना खिया लागेका जस्ता पाता फेरेर रंगीन जस्ताले नयाँ छाना बनाइएको छ । बिरामीहरूका लागि नयाँ प्रतीक्षालय निर्माण गरिएको छ भने कोठामा आवश्यक सिलिङ फ्यान, वाल फ्यान, र फर्निचर थप तथा मर्मत गरिएको छ ।
स्वास्थ्य चौकी प्रमुख युक्त नारायण अर्यालका अनुसार गत आर्थिक वर्षमा ७,७०० जनाले यहाँबाट सेवा लिएका थिए । अहिले यो केन्द्रमा नेपाल सरकारले तोकेका ९४ प्रकारका औषधिहरू निःशुल्क उपलब्ध छन् । साथै, बर्थिङ सेन्टर, प्रयोगशाला सेवा, भिडियो एक्सरेमार्फत गर्भ जाँच, पाठेघर स्क्रिनिङ, नियमित खोप, क्षयरोग उपचार, सुरक्षित गर्भपतन सेवा जस्ता सेवा नियमित प्रदान गरिँदै आएको छ ।
समितिका अध्यक्ष लिलाप्रसाद रेग्मीका अनुसार, स्वास्थ्य चौकीमा विद्युत वाइरिङ, तारबार, प्रवेशद्वार समेत व्यवस्थित बनाइएको छ । अहिलेको अवस्थाले चौकीलाई अस्पतालसरह व्यवस्थित बनाएको छ । “हामीलाई त दशैं नै आएको जस्तो अनुभव भएको छ,” स्थानीयवासीको भनाइ छ ।
यस मर्मतले केवल चौकीको रूप मात्र बदलेको छैन, नागरिकको स्वास्थ्यप्रति राज्यको गम्भीर प्रतिबद्धता पनि झल्काएको छ । अब न जोखिम मोलेर सेवा लिइनुपर्छ, न स्वास्थ्य चौकीलाई बेवारिसे हेर्नुपर्छ ।
