जिल्लाको पुतलीबजार नगरपालिका – १० राङ्खोला हुँदै बिरुवा गाउँपालिका जोड्ने सडक कालोपत्रे गर्ने काम भइरहेको छ । यहाँको राङ्खोलादेखि धोवादी सडकखण्डमा ६ किलोमिटर स्तरोन्नतिसहित प्रिमिक्स कालोपत्रे गर्ने काम भइरहेको हो ।
बिरुवा गाउँपालिका जोड्ने यो मुख्य सडक गणेशकुन्द इन्द्रयणी रक्तकन्या जेभी, काठमाडौंले भ्याट र पिएससहित १९ करोड ९३ लाख ५३ हजार १०४ रुपैयाँ ८८ पैसामा ठेक्का सम्झौता गरी स्तरोन्नतिसहित कालोपत्रेको काम गरेको हो ।
प्रदेश सरकारबाट विनियोजन भएको बजेटले सडकको स्तरोन्नति र कालोपत्रे गरिने पूर्वाधार कार्यालय स्याङ्जाका प्रमुख दयाराम अधिकारीले जानकारी दिए । उनका अनुसार कम्पनीले २०८० भदौ १२ गते गरेको सम्झौताअनुरूप ठेकेदार कम्पनीले २०८२ साउन २८ गतेसम्म काम सम्पन्न गर्ने गरी काम भइरहेको छ ।
यो सडकखण्ड कालोपत्रे गर्नका लागि तीन हजार ८९१ घनमिटर मेसिनरी, दुई हजार ९६९.७५ घनमिटर प्लम्ब, तीन हजार १८० घनमिटर ग्याबिन, सबबेस, बेसको काम सकेसँगै चैत ७ गतेदेखि कालोपत्रे गर्न सुरु गरिएको बताउँदै निर्माण कम्पनीका ज्ञानराज घिमिरेले १७ दिनलाई बाटो बन्द गरेर सडक कालोपत्रे गर्ने कामलाई तीव्रता दिइएको घिमिरेले बताए ।
कालोपत्रे गर्ने क्रममा बाधा पुग्ने भएकाले यही चैत ७ देखि ३० गतेसम्म सवारी आवागमनमा भने रोक लगाइएको छ । अति आवश्यक पर्ने एम्बुलेन्स, दमकललगायतका सवारीलाई भने नरोकिने जनाइएको छ ।
निर्धारित समय अवधिभर विभिन्न चारवटा वैकल्पिक सडकबाट आवागमन गर्न सुझाइएको छ । बस र जीप सञ्चालनका लागि बिरुवा – ओरष्टे – ज्यामिरे हुँदै घुम्ती सदरमुकामको सडकखण्ड तोकिएको छ ।
यस्तै, जीप मात्र सञ्चालनका लागि तीनवटा वैकल्पिक सडकखण्ड तय गरिएको छ । जसमा बिरुवा – धोवादी – राङ्भाङ – ज्यामिरे घुम्ती स्याङ्जा, धोवादी – खाली खाङ्ग्राङ – ज्यामिरे घुम्ती स्याङ्जा र बिरुवा – बेलघारी – गुमार्दी – पेल्काचौर – जाँडखोला हुँदै स्याङ्जा सदरमुकामसम्मको सडकखण्ड तय गरिएको छ ।
बिरुवा गाउँपालिका सदरमुकाम पुग्ने यो सडक कालोपत्रेसँगै सबै १७ किमी बाटो कालोपत्रे हुने छ । यो सडक सिद्धार्थ राजमार्गबाट बिरुवा गाउँपालिका पुग्ने छोटो, सहज र मुख्य सडक हो ।
