नाडा वाडा अटो शोमा सवारी किन्ने हरेकले ३ महिना निःशुल्क पोखरा इन्टरनेट पाउने

पोखरा । पर्यटनको राजधानी शहर पोखरामा आयोजना हुने लागेको पहिलो वाडा अटो शो २०२५ मा सवारी किन्ने हरेक व्यक्तिले ३ महिनाको लागि निःशुल्क पोखरा इन्टरनेट प्राप्त गर्ने भएका छन् ।

पश्चिमाञ्चल अटोमोबाइल्स डिलर्स एशोशिएसन (वाडा)को आयोजनामा अटो शो यही चैत १४ देखि १७ गतेसम्म पोखराको अमरसिंह माविको खेल मैदानमा हुँदैछ । उक्त शोमा आधिकारिक इन्टरनेट पार्टनरमा पोखरा इन्टरनेट रहेको छ ।

यसका साथै उक्त शो मा इन्टरनेटले निःशुल्क इन्टरनेटको सेवा समेत उपलब्ध गराउने इन्टरनेटकी मार्केटिङ एसिस्टेन्ट दिपा दुलालले जानकारी दिइन् ।

‘मेलालाई थप प्रविधिमैत्री बनाउनका लागि पोखरा इन्टरनेटले टिकट खरिद एप डाउनलोड, आगन्तुक तथा प्रदर्शकहरूका लागि उच्च गतिको इन्टरनेट, वाडा अफिस र उद्घाटन समारोहका लागि समर्पित इन्टरनेट निःशुल्क उपलब्ध गराउनेछ ।’ दुलालले भनिन् – ‘हामीले पनि मेलामा आफ्नो स्टल राख्नेछौँ। यदि तपाईंलाई इन्टरनेट जडान गर्न आवश्यक छ भने हाम्रो स्टलमा आएर जानकारी लिन सक्नुहुनेछ ।’

इन्टरनेटले समय समयमा विभिन्न अफरहरू ग्राहक समक्ष प्रदान गर्दै आइरहेको छ । पोखरामा स्थापना भएको पोखरा इन्टरनेटले गण्डकी प्रदशेका सबै जिल्लामा आफ्नो सेवा बिस्तार गरेर इन्टरनेट प्रदान गर्दै आइरहेको छ ।