पोखरा । पर्यटकीय क्षेत्र अन्नपूर्ण बेसक्याम्पमा हेलिकोप्टर उडान गर्न अब शुल्क लाग्ने भएको छ । अन्नपूर्ण गाउँपालिकाले कार्यविधि बनाएर हेलिकोप्टर उडानमा शुल्क लिने निर्णय गरेको हो । पालिकाले हेलिकोप्टर उडानबाट शुल्क लिन छुट्टै कार्यविधि बनाएको छ । उक्त कार्यविधिअनुसार प्रतिउडान १० हजार तिर्नुपर्छ । एबिसीमा उडान भर्ने हेलिकोप्टर कम्पनीलाई मंगलबारसम्मको समय दिएर पालिकामा सूचीकृत हुन आह्वान गरिएको थियो । एउटामात्रै कम्पनी सूचीकृत भएका पालिका अध्यक्ष विष्णु केसीले जानकारी दिए ।
‘दिइएको समयभित्र सिम्रिक एयरमात्रै दर्ता हुन आएको छ । अरु कम्पनीलाई थप ३ दिनको समय दिइएको छ,’ उनले भने, ‘अन्तिमपटक थपिएको समयमा पनि दर्ता हुन नआए उनीहरुले उडानको अनुमति पाउँदैनन् ।’ सूचीकरण नभएका कम्पनीको हेलिकोप्टरले भने प्रतिउडान २० हजार तिर्नुपर्ने नियम कार्यविधिमा उल्लेख छ । यस्तो नियम बुधबारदेखि नै लागु भइसकेको छ । ‘आज (बुधबार) दुईवटा उडानको पैसा तिरी सक्यो । हरेक दिन तिरे पनि भयो, हप्ता–हप्तामा तिरे पनि हुन्छ,’ केसीले भने ।
पालिकाले देशभरका १४ कम्पनीलाई सूचीकरण हुन आह्वानपत्र पठाएको थियो । ‘कसैलाई रोक्ने नियत पालिकाको छैन । तर नियम कानून मान्नुपर्छ,’ उनी भन्छन्, ‘अब बिनाशुल्क कुनै पनि हेलिकोप्टर उड्न पाउँदैनन् । नियमन पालिकाले गर्छ ।’ २०७९ मा बनाइएको कार्यविधिमा पालिकाले संशोधनसहित १ फागुनमा राजपत्रमा प्रकाशन गरेको हो । योसँगै बेस क्याम्पमा व्यावसायिक उडान गर्न चाहने कम्पनीले पालिकामा सूचीकरण गर्नुपर्छ । सूचीकरणको छुट्टै ५ हजार तिर्नुपर्छ । पालिकाबाट अनुमति लिएका कम्पनीले मात्रै वर्षैभरि उडान भर्न पाउने छन् । तर उद्धारका लागि गरिएको उडानमा भने पैसा लाग्दैन ।
गत आर्थिक वर्षमा मात्रै बेस क्याम्प क्षेत्रमा झण्डै २७० व्यावसायिक उडान भएका छन् । उनीहरुले हालसम्म अन्नपूर्ण संरक्षण क्षेत्र आयोजना (एक्याप) बाट अनुमति लिँदै आएका थिए । प्रतिउडान ३ हजार लिएर अनुमति दिइएको एक्यापका प्रमुख डा. रविन कडरियाले जानकारी दिए । उद्धार उडानको रेकर्ड भने एक्यापसँग पनि छैन । ‘हामीले अहिलेसम्म उद्धार उडानको रेकर्ड राखेका छैनौं । उद्धार उडानको पनि जानकारी एक्यापलाई गराउनुपर्छ,’ उनले भने, ‘तर पैसा नतिर्ने भएकोले त्यति व्यवस्थित डाटा राखिएको छैन । अबदेखि राख्ने भनेर लागेका छौं ।’ एक्याप क्षेत्रमा प्रवेश गर्दा सार्क मुलुकका पर्यटकले प्रतिव्यक्ति १ हजार र त्यस बाहेक मुलुकका पर्यटकले प्रतिव्यक्ति ३ हजारका दरले शुल्क तिर्नुपर्ने व्यवस्था छ ।
पालिकाले हेलिकोप्टरसँग थप शुल्क लिन लागेको हो । हेलिकोप्टर उडानबाट उठेको रकमबाट ३ प्रतिशत पर्यटन सूचना केन्द्र संचालन कोषमा खर्च गर्ने पालिकाले जनाएको छ । पर्यटन शुल्कबाट प्राप्त आम्दानी ११ नम्बर वडाको पर्यटन विकासमा खर्च गर्ने व्यवस्था कार्यविधिमा छ । कार्यविधिअनुसार बेसक्याम्पमा प्रतिदिन बढीमा १२ वटासम्म मात्रै उडान गर्न पाउने गरी व्यवस्था मिलाइएको छ । पालिका अध्यक्ष संयोजकत्वमा सहजीकरण समितिको परिकल्पना गरिएको छ । उडान व्यवस्थित रुपमा सञ्चालन भए नभएको हेर्ने दायित्व यही समितिको हुनेछ ।
उडानलाई व्यवस्थित गर्न पोखरा विमानस्थल र बेसक्याम्पमा एक–एकजना कर्मचारी पालिकाले खटाउने छ । अन्य कम्पनीलाई पनि सूचीकरणका लागि आह्वान गरिएको तर अटेर गरेका प्रमुख प्रशासकीय अधिकृत विष्णुप्रसाद पोखरेलले बताए । ‘आह्वान गरेका छौं । अरु कम्पनी आएका छैनन्,’ उनले भने, ‘दुईपटकसम्म सूचना निकालेर १४ वटै कम्पनीलाई पत्राचार गरियो । एउटा कम्पनी दर्ता हुन आएको छ । अरु दर्ता नभएकाहरुले पटकेरुपमा २० हजार शुल्क तिरेर उड्छन् ।’
एक्यापमा भएको रेकर्डकै आधारमा कम्पनीसँग शुल्क असुल गरिने उनले बताए । ‘हामीले एक्यापसँग समन्वय गरेका छौं । त्यहाँ उडान अनुमति लिँदा जति रेकर्ड छ, त्यसैको आधारमा उडान यकीन हुन्छ,’ अघि भने, ‘संख्या त्यसैलाई गनेर पालिकामा पैसा तिर्ने हो । कसैले बदमासी गर्ने भन्ने हुँदैन । निगरानी गर्न कर्मचारी राखिएको छ ।’ हेलिकोप्टर उडान शुल्कबाट पालिकाले वर्षमा डेढ करोड आम्दानी गर्ने लक्ष्य लिएको छ ।
