पाेखरा । जापान पठाएर राम्रो काममा लगाइदिने भन्दै ठगी गरेको आरोपमा पोखराका गिरी दम्पती विरुद्ध उजुरी परेको छ ।
पोखरा वडा नं. २१ निर्मलपोखरी स्थायी घर भएका नारायण गिरी र उनकी श्रीमती ईन्दिरा गिरीले जापानमा मासिक एक लाख ८० हजारदेखि ३ लाखसम्म तलब हुने काममा लगाइदिने आश्वासन दिएर साढे १४ लाख ठगी गरेको उजुरी वैदेशिक रोजगार विभागमा परेको हो ।
प्याकेजिङ काममा १ लाख ८० हजार कमाइने र म्यानेजरमा ३ लाख कमाई हुने भन्दै यहाँका सिधा सोझा युवाहरुबाट गिरी दम्पतीले त्यति धेरै रकम उठाएका हुन् ।
उजुरी अनुसार गिरी दम्पतीले पोखरा २१ कै भाइ नाता पर्ने राजु गिरीबाट ११ लाख ५० हजार र पोखरा ९ का बिक्रम खत्रीबाट ३ लाख लिएका छन् ।
पैसा लिएको ३ वर्ष ४ महिना भइसक्दा पनि जापान नपठाएपछि गिरी र खत्रीले पैसा फिर्ता माग्दा नदिएपछि उजुरी दिन बाध्य भएको पीडितले बताएका छन् । उनीहरुले असाेज २६ गते वैदेशिक रोजगार विभाग काठमाण्डौंमा उजुरी दिएका हुन् ।
नारायण गिरी हाल जापानमा रहेको बताइन्छ । उनकी श्रीमति ईन्दिरा भने काठमाण्डौमै छिन् । यद्यपी उनीहरुले काममा लैजान्नँ, पैसा दिन्नँ भन्दैनन् ।
झण्डै साढे ३ बर्षदेखि अर्को हप्ता, अर्को महिना लैजान्छु भन्दै समय समयमा फेसबुक म्यासेज गरिरहन्छन् ।
नारायण गिरी काठमाण्डौमै रहँदा युवाहरुसँग भेटेका पनि थिए । त्यसपछि विस्तारै सम्पर्क पातालिँदै गयो र फेसबुक च्याटमा सीमित भयो । अब पैसा फिर्ता नदिने देखिएपछि युवाहरु असोज २५ गते ईन्दिरालाई भेट्न काठमाण्डौ पुगे । तर, थेरापी गर्ने बहानामा भेट्न मानिनन् । त्यसपछि बाध्य भएर पीडितहरु विभागमा उजुरी गर्न पुगेका हुन् ।
गिरी दम्पतीले लिएको साढे १४ लाख बैंक ट्रान्जेक्शन मात्रै हो । नगद दिनेहरु प्रमाण नभएकाले अहिलेसम्म मिडियासम्म आइपुगेका छैनन् । अरु धेरै ठगिएको हुनसक्ने आशंका गरिएको छ । यदि गिरी दम्पतिले जापान लैजान्छु भन्दै अन्यहरुलाई पनि ठगेको भए सम्पर्कमा आउन पीडितहरुले अपिलसमेत गरेका छन् ।
यस विषयमा थप बुझ्न गिरी दम्पतीलाई गण्डकीन्यूले पटक पटक सम्पर्क गर्न खोज्दा फोनमा सम्पर्क भएन । ईन्दिराले लिएको मोबाइल नं. ९८४३***५५० मा फोन गएपनि उठाइनन् ।
राजु गिरी र बिक्रम खत्रीले दिएको उजुरी यस्तो छ:
विक्रम खत्रीले इन्दिरा गिरीका नाममा सिद्धार्थ बैंकमा २०२० मार्च १३ तारिखमा डिपाेजिट गरिदिएकाे ३ लाख रूपैंयाकाे भाैचरः
